Shu yil 26-27 yanvar' kunlari Qoraqalpog'iston musulmonlari qoziyoti qozisi Bahromiddin domla Razov To'rtko'l tumanida bo'lib, masjidlar faoliyati bilan tanishish, jamoatga juma mav'izasini qilib berish, ehtiyojmand oilalar holidan xabar olish kabi bir qancha ishlarni amalga oshirdi.

Dastlab Bahromiddin domla “Mulla Jumaboy” masjidida jamoatga “Omonatdorlik  – Abu Ubayda ibn Jarroh timsolida” mavzusida manfaatli mav'iza qilib berdi. Suhbat davomida elimizda hukm surayotgan tinchlik-hotirjamlikning qadriga etish, yoshlar tarbiyasiga alohida e'tibor qaratish, ularning ilm va kasb-hunar egallashiga ko'maklashi borasida ham so'z yuritdi.   

Juma namozidan so'ng Qozi domla “Mehr harakati” doirasida “O'zbekiston” va “Tinchlik” mahallalarida yashovchi ehtiyojmand va boquvchisini yo'qotgan oilalar holidan xabar olib, homiylar ko'magida ularga oziq-ovqat mahsulotlarini ulashdi.

Tashrif davomida Bahromiddin domla tumanda qayta qurilyotgan “Muntuk bobo” va “Shoraxan” masjidlari qurilish jarayonini ko'zdan kechirib, Qorqalpog'iston qoziyoti nomidan uning qurilishiga yaqindan yordam berayotgan insonlarga minnatdorlik bildirib, haqlariga duoi xayrlar qildi. Shuningdek, mazkur masjid xodimlari bilan uchrashib, ularning fikr-mulohazalarini tingladi va qator topshiriqlar berdi.

27 yanvar' kuni esa ushbu tumanning olis hududida joylashgan “Miskin bobo” va “Janbasqal'a” masjidlarida bo'lib, soha xodimlari va namozxonlarga qilingan sharoitlar bilan tanishdi.

Qozi domla xizmat safari davomida To'rtko'l tumani bosh imom-xatibi Do'stnazar domla Qilichovga qurilishi bo'layotgan masjidlardan xabar olib turish, berilgan vazifalarni o'z vaqtida bajarish bo'yicha topshiriq va tavsiyalar berdi

Qorqalpog'iston musulmonlari qoziyoti

Matbuot xizmati