Agar insonning ko‘zlarida yosh bo‘lmasa nima bo‘lardi? Bu ko‘z yoshining foydasi nima?

Alloh taolo bizning ko‘zlarimiz himoyasi uchun qosh, qovoq, kiprik va ko‘z yoshini ato etgan. Ko‘z yoshi ko‘z soqqasini namlab, uni qurib qolishdan himoya qiladi. Kiprik esa bir necha soniya davomida yumilib-ochilib turadi va bu orqali ko‘z yoshining ko‘zning hamma joylariga yetib borishini ta’minlaydi. Agar ko‘zdan suyuqlik chiqmaganda ko‘z qurib qolgan va tez orada o‘z faoliyatini bajara olmay qolgan bo‘lardi.

Ha, ko‘z yoshi ko‘zni namlash va unga yopishgan turli bakteriyalarni yuvish vazifasini bajaradi. Unda yana biz bilmagan ko‘plab foydalar, vazifalar bor. Inson yig‘laganda, uning ko‘zida joylashgan bezlar yosh ishlab chiqaradi. Ma’lumki, inson turli sabablarga ko‘ra yig‘laydi. Ba’zilar siqilib, ba’zilar og‘riqdan, ayrimlar dunyo uchun yig‘laydi. Ammo yig‘ilarning ichida eng afzali va ulug‘i Alloh taolodan qo‘rqib yig‘lashdir. Ha, inson Robbisidan qo‘rqib yig‘lasa, uning ko‘zlari eng yaxshi ko‘z yoshini ishlab chiqaradi. Bu shunday ko‘z yoshiki, u oxiratda do‘zax olovini o‘chira olishi haqida hadisi shariflarda aytilgan.

Alloh taolo Qur’oni Karimda shunday marhamat qilgan:

وَيَخِرُّونَ لِلأَذْقَانِ يَبْكُونَ وَيَزِيدُهُمْ خُشُوعاً

“Va yuzlari ila yiqilib yig‘larlar va u xokisorliklarni ziyoda qilur” (Isro surasi, 109-oyat).

Alloh taolodan qo‘rqib, gunohlarini eslab yig‘lagan kishining ko‘zyoshlari nafaqat uning ko‘zlarini namlab, uni mikroblardan tozalaydi, balki, Allohdan qo‘rqib to‘kilgani uchun oxiratda do‘zax olovidan himoyalanishiga sabab bo‘ladi.

Abduddoim Kahelning maqolasi asosida

Nozimjon Iminjonov tayyorladi