2019 yil 12-avgust kuni Qirollik saroyida Saudiya Arabistoni Podshohi Salmon bin Abdulaziz Ol Saud hurmatli kishilar, Ikki muqaddas masjid mehmonlari, hukumat amaldorlari, delegatsiya rahbarlari va ziyoratchilarga xizmat ko‘rsatadigan idora rahbarlari uchun qabul marosimini o‘tkazdi.
Mazkur tadbirda Din ishlari bo‘yicha qo‘mita raisi, «Haj-2019» ishchi guruhi rahbari J.Akramov, O‘zbekistonning Saudiyadagi elchisi U.Maqsudov hamda qirol mehmoni sifatida N.Nodirov ishtirok etdi.
Tadbir Qur’oni karim tilovati bilan boshlandi.
Tadbirda Salmon bin Abdulaziz Ol Saud nutq so‘zlab shunday dedi:
- Xudo Saudiya Arabistoni Podshohligini Ikki muqaddas masjidga va Rahmon mehmonlariga(hojilar) xizmat qilish bilan sharafladi, bu biz uchun g‘ururdir. Qirol Abdulaziz davridan boshlab, to bugungacha dunyo musulmonlari Haj ibodatini qulay sharoitlarda, mukammal ado etishlari uchun barcha kuch g‘ayratimizni sarflayapmiz.
Allohdan amallaringizni qabul bo‘lishini, eson-omon o‘z yurtingizga yetib olishingizni so‘rayman.
Shuningdek, tadbirda Haj va Umra vaziri doktor Muhammad Solih bin Taher Bintin so‘zga chiqib, ziyoratchilar va butun dunyo musulmonlarini Qurbon hayiti bilan tabrikladi.
U o‘z nutqida dunyoning 130 dan ortiq mamlakatidan kelgan, tili, irqi, rangi har xil bo‘lgan 170 dan ortiq millat va elat vakillaridan iborat 3 millionga yaqin inson Arafotda hozir bo‘lganini, ularning uchdan bir qismi 70 yoshdan oshgan qariyalar ekanini aytib o‘tdi.
Tadbirda shahzoda Muhammad bin Salmon nazorati ostida hojilarning haj amallarini bajarish va xavfsizligini ta’minlash masalasi Qirollikning doimiy e’tiborida ekani ta’kidlandi.

Din ishlari bo‘yicha qo‘mita
Matbuot xizmati