Haj pallasi Alloh taoloni zikr qilish avjiga chiqadigan mavsum. Buning avji esa Qurbon hayiti kunlari bo‘lib, qurbonlik so‘yish bilan yanada maromiga yetadi. Bugan har bir hoji nomidan Allohning yo‘lida chorva hayvonlari qurbonlik qilindi.

Hanafiy mazhabi bo‘yicha qurbonlik qilish vojib amaldir. Qurbonlik qilish hur, oqil, muqim va zakot nisobiga molik bo‘lgan musulmon shaxsga vojib bo‘ladi. Qurbonlik qilishning ulug‘ amal ekani haqida Hazrati Payg‘ambarimiz sollallohu alayhi vasallamning quyidagi hadislarida bayon etilgan: “Qurbonlik kunlari Odam bolasi qiladigan amallar ichida qon oqizishdan (jonliq so‘yishdan) ko‘ra, Allohga mahbubroq amal yo‘qdir...” (Imom Termiziy rivoyati). 

Yana bir hadisi sharifda bu dunyoda qurbonlik uchun so‘yilgan jonliqning qiyomat kuni Sirot ko‘prigidan o‘tar paytda hozir bo‘lib, sohibini o‘zining ustiga mindirishi va Sirotdan olib o‘tishi haqida aytilgan.

Qurbon hayiti boshqa bayramlardan shunisi bilan ajralib turadiki, mazkur ayyomda Alloh yo‘liga qurbonlik qilingan hayvonlar go‘shtlari uzoq-yaqindagi muhtojlar, yetim-yesirlarga va ehtiyojmand kishilarga tarqatish ila ularning ko‘ngillari shod etiladi. 

Saudiya Arabistoni hukumati ham hojilarimizning qurbonlik go‘shtlarini uzoq mintaqalardagi og‘ir sharoitlarda kun kechirayotgan mo‘min-musulmonlarga yetkazish bilan ushbu savobli ishni yanada ziyoda aylaydi.

Barcha hojilarning qurbonliklarini Haq taolo qabul aylasin.

O‘zbekiston musulmonlari idorasi Matbuot xizmati