1. G‘usl qilish.
2. Yangi kiyimlarni kiyish.
3. Xushbo‘ylanish.
4. Qurbon hayiti namozidan qaytib, o‘zining qurbonligi go‘shtidan yegunga qadar hech narsa yemay turish.

Abdulloh ibn Burayda otasidan rivoyat qiladi: “Nabiy sollallohu alayhi vasallam og‘iz ochish kunida (Ramazon hayitida) taomlanmasdan chiqmasdilar, qurbonlik kunida esa namoz o‘qigunlaricha taomlanmasdilar” (Imom Termiziy rivoyati).

Anas roziyallohu anhudan rivoyat qilinadi: “Rasululloh sollallohu alayhi vasallam og‘iz ochish kunida (Ramazon hayitida) bir nechta xurmo yemasdan (namozgohga) chiqmasdilar” (Imom Buxoriy rivoyati).

Eslatma! Ba’zilar qurbon hayitida hech narsa yemay namozga chiqish sunnatligini noto‘g‘ri tushunib, qurbon hayitida kunning avvalgi yarmiga qadar ro‘zani niyat qilish kerak, deyishadi. Shu bilan birga ular ushbu kun saharlikka turishadi va og‘izlarini niyat bilan berkitib namozga chiqishadi. Hayit namozi o‘qib bo‘lingach esa, xuddi iftorlikdagi kabi og‘izlarini ochishadi. Bu noto‘g‘ridir. Hayit kunlarida ro‘zani niyat qilish harom amallardandir. Qolaversa, yarim kunga ro‘za niyat qilinmaydi.

5. Masjidga imkon bo‘lsa piyoda, erta borish va yo‘lda tahlil (Laa ilaha illalloh) hamda takbir (Allohu akbar) aytish.

6. Hayit bilan muborakbod etish.

Sahobalar: “Alloh bizdan ham, sizdan ham qabul etsin”, deb bir-birlarini iyd bilan tabriklashardi.

7. Namozga bir ko‘chadan borib, boshqasidan qaytish.

Jobir roziyallohu anhu aytadi: “Nabiy sollallohu alayhi vasallam qachon iyd kuni bo‘lsa yo‘lni farqli qilardilar” (Imom Buxoriy rivoyati).

8. Qarindosh, yosh ulug‘larni ziyorat qilish.

9. Qo‘ni-qo‘shnilarni bayram bilan tabriklash.

10. Ahli ayol va yosh bolalarni xursand qilish.

Davron NURMUHAMMAD