Haj amallarini ado etishga hozirlik ko‘rayotgan yurtdoshlarimiz qalblari o‘zgacha quvonchga to‘lib, ibodat zavqini his etmoqdalar. Boisi bu yerdagi qulay shart-sharoitlar, yaratilgan imkoniyatlar juda ham yuqori darajada.
Makka shahridagi ishchi guruhining bildirishicha, ziyoratchilarimizga Makkai mukarramada zamonaviy mehmonxona o‘zbekistonlik ziyoratchilar xizmatida bo‘lmoqda. Ayni kunlarda, ziyoratchilar ibodatlarini chiroyli va mukammal ado etishlari uchun mehmonxonada barcha qulayliklar muhayyo qilingan.

5 avgust kuni O‘zbekiston musulmonlari idorasi raisi, muftiy Usmonxon Alimov hazratlari ziyoratchilarning taomlanish jarayonlari bilan yaqindan tanishdilar, ular bilan birgalikda tamaddi qildilar.
Aytish joizki, O‘zbekistondan borgan 15 nafar mohir oshpazlar ziyoratchilarimizga o‘zlarini huddi vatandagidek his etishlari va ibodatlarda yengillik bo‘lishi uchun munosib taomlarni tortiq etishmoqda.
Muftiy hazratlari ziyoratchilarning taomnomasida issiq kunlarda odamlarni zo‘riqtirmaydigan va ibodat qilishlariga halal bermaydigan ovqatlar bo‘lishiga alohida e’tibor qaratish zarurligini ta’kidladilar. Shuningdek, milliy taomlar, parranda, baliq va yengil hazm bo‘ladigan ovqatlar tayyorlashini oshpazlarga tavsiya etdilar. Kuchli qovurilgan, yog‘li va hamrli taomlardan imkon qadar saqlanishni bildirdilar.
Saudiya Arabistonidagi hamkor “al-Hidoya” shirkati tomonidan taomlar so‘nggida olma, xurmo, nok, banan kabi ho‘l mevalar hamda qatiq kabi sut mahsulotlari berilmoqda. Iloji boricha ko‘proq suv va sharbatlar ichish shifokorlar tomonidan tavsiya etilmoqda, chunki issiq ob-havo sharoitida organizmda suyuqlik miqdorini normal darajada saqlab turish uchun juda ham muhimdir.

Bir so‘z bilan aytgan-da, ziyoratchilarimizga barcha shart-sharoitlar eng yuqori darajada muhayyo qilingan, asosiy maqsad esa ularning ibodat halovatlarini topishlariga xizmat qilishdir.

O‘zbekiston musulmonlari idorasi Matbuot xizmati