Islom olami robitasining Kitob va sunnatga xizmat qilish hay’ati va Dog‘iston musulmonlar idorasi imom Navaviy nomli madrasada Qur’on musobaqasini tashkil etishdi. Bu haqda ioqas.org nashri xabar beradi.

Ushbu musobaqa faqat ulug‘ yoshli Qur’on hofizlari uchun tashkil etilgan bo‘lib, unda yigirma bir ishtirokchi qatnashdi.

Yoshi ulug‘ ishtirokchilarni qo‘llab-quvvatlash uchun kelgan muxlislarning juda ko‘p bo‘lgani ham musobaqaning yana bir e’tiborli jihatlaridandir.

Musobaqa g‘oliblarini taqdirlash uchun marosimga Rossiyada Kitob va sunnatga xizmat qilish hay’atining rahbari Ustoz Ibrohim Soburov va Dog‘iston musulmonlari idorasi xorijiy aloqalar bo‘limi boshlig‘i Doktor Shahobiddin Husaynov hamda Dog‘iston muftiysi Shayx Ilyos Amlatov tashrif buyurdi.

Yakunda musobaqa ishtirokchilariga esdalik sovg‘alar topshirildi, hamda musobaqa tashkilotchilariga minnatdorchilik bildirildi. Shuningdek, Islom Olami Robitasining Qur’oni karimga qilayotgan hizmatlariga muvaffaqiyatlar tilab duoyi-xayrlar qilindi.

O‘zbekiston musulmonlari idorasi Matbuot xizmati