Asli kasbim o‘qituvchi. 40 yildan ortiq yoshlarga ta’lim-tarbiya berdim. Alloh nasib qilib, haj ibodatini ado etish baxtiga muyassar bo‘lish arafasida turibman. Har gal Ka’bani tavof qilar ekanman, rahmatli onamning bir so‘zlari yodimga tushadi. – Bolam, odamlarni koriga yaragan, ularni rozi qilgan, Yaratganni rizoligini topadi. Elim desang, el ardoqlaydi, Alloh desang O‘zi yaxshi niyatlaringga yetkazadi, derdi onam. Men ham onamning purma’no so‘zlariga amal qilib, ozmi-ko‘p el koriga yarashga intildim. Muborak safar oldidan, mahallamizdagi ehtiyojmandlarga qo‘limdan kelgancha yordam berdim. Ajrashish arafasida turgan bir yosh oilani saqlab qolishga erishdim. Mahalla ahlining duosini olib muborak safarga keldim. Ilohim, elu yurtimiz tinchligi, osoyishtaligi, farzandlarimiz kamolotini so‘rab qilayotgan duolarimizni Yaratgan ijobat qilsin.
Fazliddin NAJMIDDINOV,
Namangan viloyatidan.

Ehtiromdan boshimiz ko‘kda
«Men avtomobillarga texnik xizmat ko‘rsatish sohasida 30 yildan ko‘proq mehnat qildim. Alloh nasib qilgan ekan, bu yil haj safariga keldim. Kelishimdan oldin, mahallamizda bir nochor oilani uyini bitkazishga, yana bir boquvchisini yo‘qotgan oilaga qo‘ldan kelgancha yordam ko‘rsatdim. Allohga yoqqan bir ezgu ishim bor ekan-ki, O‘zini ulug‘ baytini ziyorat qilish, haj ibodatini ado etish baxtiga muyassar qildi. Shu o‘rinda bir narsaga e’tiboringizni qaratmoqchiman: men Madina va Makka shaharlarida o‘zbekistonlik hojilarimiz uchun ajratilgan mehmonxonalar va ulardagi shart-sharoitlardan, ochig‘i, hayratga tushdim. Chunki, yuryapmiz, ko‘ryapmiz, eshityapmiz, solishtiryapmiz boshqa davlatlarning hojilariga bunday e’tibor yo‘q. Bu ehtiromdan boshimiz ko‘kda. Har gal Ka’bani tavof qilar ekanmiz, ana shunday qulayliklarni bizga hozirlab bergan davlatimiz Rahbarini, barcha-barchani duolarimizda eslayapmiz, yurtimizga tinchlik-osoyishtalik, barqarorlik, xalqaro maydonda nomimiz va o‘rnimiz bundan-da sarbaland bo‘lishini so‘rayapmiz».
Tolibjon IMONQULOV, Andijon viloyati, Marhamat tumanidan.