«Iymon» kitobi qoraqalpoq tiliga tarjima qilindi
Ma’lumki, Shayx Muhammad Sodiq Muhammad Yusuf rahimahullohning kitoblari hayotlik chog‘laridayoq boshqa tillarga tarjima qilina boshlangan edi. Bu xayrli ish hamon davom etmoqda. Shunday tarjimalardan biri «Iymon» kitobining qoraqalpoq tiliga tarjimasi bo‘ldi.
Ushbu kitob Shayx hazratlarining dastlabki kitoblaridan biri bo‘lib, 1991 yilda ilk bor nashr etilgan edi. Keyinchalik kitob qayta-qayta nashr etildi. Ayni kunlarda uning qoraqalpoq tiliga tarjimasi chop etilmoqda. Shuni ham eslatib o‘tish joizki, ushbu kitob muallifning hayotlik chog‘ida rus tiliga tarjima qilinib, chop etilgan.
Kitobning qoraqalpoq tilidagi tarjimasi esa, tez orada sotuvga chiqarilishi kutilmoqda.
Kitob sotuvga qo‘yilgach O‘zbekiston bo‘ylab barcha filiallaridan va internet orqali kitoblardunyosi.uz saytidan onlayn tarzda xarid qilishingiz mumkin.
O‘zbekiston musulmonlari idorasi Matbuot xizmati
Namozim buzildimi?
Savol: Masjiddagi jamoatda ba’zan oldingi safdagi odamning kiyimi kalta bo‘lgani uchun sajdada orqasi qisman ochilib qoladi va bexosdan unga ko‘zimiz tushib qoladi. Shu holatda tahorat yoki namozimiz buzilmaydimi?
Javob: Bismillahir Rohmanir Rohiym. Ulamolar tahorat va namozni buzuvchi omillarni birma-bir sanaganlar. Ular ichida birovning avratiga ko‘z tushib qolish sababli buziladi, degan gap yo‘q. Birovning, xoh ayolning, xoh erkakning avratiga qarash sababli bavl yoki biror suyuqlik chiqmasa, tahorat sinmaydi. Ammo bu degani qarash, nazar solish mumkin ekan, deb tushunmaslik kerak. Chunki bunday ishlar aslo mumkin emas.
Bir narsani yodda tutish lozimki, namoz o‘qish uchun tayyorlanayotgan inson namoz o‘qish asnosida avratlari ochilib qolmasligining chorasini ko‘rishi kerak bo‘ladi. Chunki bir rukn (farz amali) miqdoricha avratining to‘rtdan biri ochilib tursa, uning namozi buziladi. Vallohu a’lam.
O‘zbekiston musulmonlari idorasi
Fatvo markazi