19 iyul kuni O‘zbekiston musulmonlari idorasi raisi, muftiy Usmonxon Alimov hazratlari juma namozini ado etish uchun Toshkent shahridagi yangidan barpo etilgan “Koh ota buzruk” jome masjidiga tashrif buyurdilar. Ushbu qaytadan bunyod etilgan ko‘rkam jomeda muborak kun ibodatini ado etish uchun minglab namozxonlar jam bo‘ldilar.
Muftiy hazratlari juma mav’izasida bugungi kunda mo‘min-musulmonlarga muhtaram Prezidentimiz rahnamoliklarida juda katta imkoniyatlar berilayotgani haqida gapirib, yurtimizda yangi masjid-madrasalarni qurish, mavjudlarini zamonaviy ko‘rinishda qayta ta’mirlash ishlari jadal davom etayotganini so‘zlab berdilar.
O‘tgan Ramazon oyi va undan keyin ham yangi-yangi jomelar ochilgani, yaqinlashib kelayotgan Qurbon hayiti oldidan ham Toshkent shahri va boshqa hududlarda ko‘plab jome masjidlarni yangidan qurish ishlari, xalqimizga tuhfa etish marosimlar davom etayotganini bildirdilar.
Muftiy hazratlari respublikamizning har bir hududidagi mana shunday jomelarda namozxonlar uchun yaratilgan shart-sharoitlar, masjidlardagi qulayliklar hozirlangani, imom-xatiblar faoliyati bilan yaqindan tanishilgani va masjid qavmi ila dildan suhbat qilinganida ularning kayfiyati juda ham chog‘ ekanini bayon qilib berdilar.
Mav’izada muftiy hazratlari namozxonlarga bugungi kunda mamlakatimizda olib borilayotgan muborak dinimiz taraqqiyoti yo‘lidagi shunday xayrli ishlar, ijrootlar va bunday ne’matlarga har bir kishi Parvardigorga shukrona qilishi lozimligini aytib, Hazrati Payg‘ambarimiz sollallohu alayhi va sallamning “Sadaqai joriya” haqidagi hadisi shariflarini izohlab berdilar.
“Koh ota buzruk” jome masjidida qurilish ishlari 2017 yilda boshlangan. 2018 yil mart oyida Shayx Abdulaziz Mansur boshchiligida yangi bino uchun birinchi g‘isht qo‘yilgan. Mahalla ahli va ko‘plab ixlosmandlar ko‘magida, saxovatpesha kishilar yordami ila hashar yo‘li bilan boshlangan mazkur xayrli ish bugun o‘z nihoyasiga yetdi. Masjidning hozirda qurilgan yangi binosining sig‘imi bir vaqtning o‘zida 2000 ming nafardan ortiq namozxonni sig‘dira oladi.
Masjid namozxonlar uchun yetarli darajadagi shart-sharoitlar bilan ta’minlandi. Xonaqoh tepasiga bitta katta va to‘rtta kichik gumbaz barpo etildi. O‘ttiz besh metrli minora masjidning ko‘rkiga fayz baxsh etib turibdi. Masjid xonaqoh va yerto‘la qismining har ikkisida ham sovutgichlar haroratni salqin qilib, bir maromda ushlab turishiga qulay bo‘lsin uchun tepada, shiftda joylashtirilgan. Xonaqohda sharq me’morchiligiga xos turli bo‘yoqlar o‘ziga xoslik baxsh etgan bo‘lsada, yong‘in xavfsizligi inobatga olinib, binoga bironta ham yog‘och mahsulotlari ishlatilmagan.
Yangi binoning ochilish marosimida ko‘plab taniqli mehmonlar, imom-xatiblar va boshqa ulamolar ishtirok etdi.
Yurtimizda amalga oshirilayotgan Allohning uyini obod qilishdek xayrli ishlarda ishtirok etayotganlar haqlariga xayrli duolar qilindi.
O‘zbekiston musulmonlari idorasi Matbuot xizmati
O‘zbekiston musulmonlari idorasining Namangan viloyat vakilligida viloyat bosh imom-xatibi Musoxon domla Abbosiddinov rahbarliklarida viloyat Adliya boshqarmasi bilan hamkorlikda viloyatda faoliyat ko‘rsatayotgan masjidlar mutavallilari uchun yig‘ilish o‘tkazildi.
Yig‘ilishda viloyat Adliya boshqarmasi mutaxassisi Z.Axmedxodjayeva, Yangi Namangan tumani kadastr bo‘limi boshlig‘i O.Usmanov, notarius A.Artiqovlar ishtirok etdilar.
Unda notiqlar tomonidan mutavalli masjid imom-xatibining xo‘jalik ishlari bo‘yicha yordamchisi, masjidlarning iqtisodiy faoliyatini yaxshilash, xodimlarning oylik ish xaqi bilan ta’minlash, qurilish-ta’mirlash ishlarini belgilangan tartib va me’yorlarga rioya qilgan holda amalga oshirish, masjid mulkini iqtisod qilish maqsadida geleokollektorlar o‘rnatish, mavjud qozonxonalarni xavfsiz hududlarga olib chiqish, ish yuritish nomenklaturasiga, ichki mehnat tartib qoidalariga va muomala madaniyatiga rioya qilish, masjidlarning tozalik va obodonlashtirish ishlariga mas’ul ekanini aytib o‘tildi.
Masjidlarning ta’sis xujjatlari, ish haqlarini me’yorlashtirish, yangi xodim ishga qabul qilinganda Adliya boshqarmasini onlayn xabardor qilish, masjidlardagi mavjud “tekshirishlarni ro‘yxatga olish kitobi”ni yuritish tartibi yuzasidan tushuntirish ishlari olib borildi.
Yig‘ilish davomida masjidlarning qo‘shimcha yer maydonlarini qonuniylashtirish, kadastr hujjatini rasmiylashtirish tartib-qoidalari va huquqiy oqibatlari haqida batafsil ma’lumotlar berildi.
Yig‘ilish davomida qatnashchilar o‘zlarining qiziqtirgan savollariga mutaxassislar tomonidan batafsil javoblar oldilar.
O‘zbekiston musulmonlari idorasi
Namangan viloyati vakilligi
Matbuot xizmati