Qirol Salmon Yangi Zelandiyaning Kraystcherch shahri masjidlaridagi teraktda qurbon bo‘lganlarning 200 nafar yaqinlari Saudiya Arabistoni hisobidan haj ziyoratini amalga oshirishini tashkillashtirish haqidagi farmonga imzo chekdi.
ArabNews xabariga ko‘ra, bu haqda Saudiya Arabistonining Islomiy ishlar vaziri Abdullatif ibn Abdulaziz ma’lum qilgan.
Saudiya Arabistonining Yangi Zelandiyadagi elchixonasi Kraystcherch teraktni qurbonlarining yaqinlaridan hajga boradiganlarning ro‘yxatini tuzmoqda. Xususan, “Nur” masjidida to‘qqizta o‘qdan yaralangan, lekin omon qolgan Temel Atako‘g‘li ham hajga taklifnoma oldi.
Yangi Zelandiya musulmonlari odatda hajga borish uchun 15 ming dollar to‘lashadi.
O‘zbekiston musulmonlari idorasi Matbuot xizmati
Qozog‘iston musulmonlari diniy boshqarmasi tashkil topganiga 35 yil to‘lgani munosabati bilan Olmaota shahrida “Markaziy Osiyo va Qozog‘istonda Islom: tarixiy an’analar va zamonaviy imkoniyatlar” mavzusida nufuzli xalqaro anjuman o‘tkazildi. Unda turli davlatlardan kelgan islom ulamolari ishtirok etishdi. Jumladan, O‘zbekiston musulmonlari idorasi huzuridagi Fatvo markazi direktor o‘rinbosari G‘ulomiddin Xolboyev ham qatnashib, “Sun’iy ong (intellekt) va uning hukmi” mavzusida chiqish qildi.
Darhaqiqat, sun’iy ong (SO) – odam kabi fikrlab, qo‘yilgan muammoga yechim topishga yo‘naltirilgan bugungi texnologiya. Garchi u turli uskuna va jihozlar ko‘rinishida bo‘lsa ham, qaror qabul qilish, insoniy xulq-atvorga taqlid qilish kabi qobiliyatlarga ega.
Axborot asri deb atalayotgan bugunga kelib ilm-fan va axborot-kommunikatsiya texnologiyalari juda ham tez va shiddat bilan rivojlanib bormoqda. Taraqqiy etgan o‘lkalarda sun’iy intellekt imkoniyatlaridan foydalanish kengayib, u ko‘plab sohalarga kirib bormoqda. Ushbu “ong”ning shar’iy hukmiga aniqlik kiritish zamona faqihlari oldida turgan muhim vazifalardan. Zero, undan musulmonlar ham keng miqyosda foydalanmoqda.
O‘zbekiston ulamolari vakili G‘ulomiddin domla Xolboyevning chiqishi shu ma’noda katta qiziqish bilan tinglandi.
O‘zbekiston musulmonlari idorasi
Matbuot xizmati