Masjidlar Alloh taoloning yerdagi uylaridir. Uni obod etish har bir musulmon uchun ulkan ajru savobdir. Masjid qurilgan joyda qut-baraka bo‘ladi.
Joriy yilning 16 iyul kuni Toshkent viloyati Qibray tumanidagi "Chinobod" mahallasida faoliyat yuritib kelayotgan "Masharib ota" jome’ masjidining eski, yaroqsiz holga kelib qolgan binosi o‘rnida, zamonaviy, namozxonlarga har tomonlama qulay va barcha sharoitlarga ega qilib yangidan qurilishi uchun birinchi g‘isht qo‘yish marosimi bo‘lib o‘tdi.
Marosimda Toshkent viloyati bosh imom-xatibi Xayrulloh domla Turmatov, tuman imomlari, mahalla oqsoqollari va faollari ishtirok etdi. Ilk g‘ishni qo‘yib bergan Xayrulloh domla Turmatov yig‘ilganlarga yurtimizda din rivoji yo‘lida amalga oshirilayotgan islohotlar va musulmonlarga ibodat qilishlari uchun tashkil etilayotgan sharoitlar haqida to‘xtalar ekanlar, bu ayniqsa ko‘rkam va zamonaviy tarzda qayta qurilayotgan masjidlarda ayniqsa namoyon bo‘layotganini ta’kidladilar. Bu, o‘z navbatida, yurtdoshlarimiz qalbiga shodlik ulashib, ne’matga shukronalik hissini ziyoda qilayotganini bayon qildilar.
O‘zbekiston musulmonlari idorasi Matbuot xizmati
Kecha, 28 aprel kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ishtiroklarida “Haj – 2025” mavsumini yuqori darajada o‘tkazish bo‘yicha videoselektor yig‘ilishi bo‘lib o‘tdi. Unda haj delegatsiyasi vakillari, ishchi guruhi a’zolari, mingboshilar va shifokorlar jamoasi ishtirok etdi.
Majlis avvalida Muftiy hazratlari haj qiluvchi inson Haq taoloning mehmoni ekani, shu bois haj amalini bajarayotgan kishiga ko‘mak bergan, uning og‘irini yengil qilgan inson ulug‘ ajru savoblarga noil bo‘lishi haqida so‘zladilar. Shuningdek, har bir ishchi guruhi a’zosi ana shunday ulug‘ darajalarni maqsad qilib, Rahmonning mehmonlariga O‘zi rozi bo‘ladigan darajada sidqidildan xizmat qilishi lozimligini alohida qayd etdilar.
Shayx Nuriddin Xoliqnazar hazratlari yig‘ilish davomida muborak safarga qadar ziyoratchilar bilan muntazam suhbatlar tashkil etish va ularda hajning tartib-qoidalari, farz, vojib va sunnatlari, o‘ziga xos mashaqqatlarini tushuntirish va zikru duolar qilish va yurtdoshlarimizning barcha savollariga batafsil javob berish zarurligini ta’kidladilar. Shuningdek, muborak zaminlarda har bir daqiqani g‘animat bilish, toatu ibodat ila o‘tkazish masalalariga alohida e’tibor qilishga urg‘u qaratdilar.
O‘zbekiston musulmonlari idorasi raisi o‘rinbosari Obidjon Qodirov, Din ishlari bo‘yicha qo‘mita Ziyorat turizmini rivojlantirish bo‘limi boshlig‘i Bobomurod Rustamov va Shifokorlar guruhi rahbari Alisher Saatov kabilar so‘zga chiqib, tashkiliy ishlar, tibbiy jihatlar, xat-hujjatlar, jamoaviy tartib-intizomga rioya etish, qonun-qoidalarga amal qilish, hojilar xavfsizlini ta’minlash va ogohlikga oid muhim tavsiyalarni berdilar.
Shuningdek, joriy mavsumda “Haj – 2025” ishchi guruhi va shifokorlar zimmasiga juda katta mas’uliyat yuklangani, shu bois har kim o‘z vazifasini vijdonan to‘la bajarishi zarurligi ta’kidlandi.
Tadbir yakunida Haq taolodan bu yilgi haj mavsumi muvaffaqiyatli o‘tishini so‘rab xayrli duolar qilindi.
O‘zbekiston musulmonlari idorasi Matbuot xizmati