Qur’on ila safar
Avval, yurtimizdagi qiroat ilmi olimlaridan eng mashhuri bo‘lgan Alijon qori Fayzulloh Maxdum o‘g‘lining “Qur’on qalb shifosi” mavzusidagi turkum ma’rifiy suhbatlarini muslim.uz saytida namoyish etish haqida xabar bergan edik.
Ushbu loyihamiz muqaddimasida musulmon dunyosida mashhur bo‘lgan, eng nufuzli qori ustozlar chiqadigan «Ahlul Qur’an» telekanalida namoyish etilgan Alijon qori Fayzulloh Maxdum o‘g‘lining tarjima holi to‘g‘risidagi ma’lumotlarni e’tiboringizga havola etamiz.
Ma’lumot o‘rnida, «Ahlul Qur’an» («Qur’on ahli») kanali — Qur’oni karimni o‘rgatish, unga xizmat qilish, Qur’on ixlosmandlarining unga bo‘lgan muhabbatini oshirish, Qur’on axloqi bilan xulqlanishga chorlash, Qur’onni yoyish orqali dinni yetkazish jarayonlarini amalga oshirish va bu bilan «Mendan bir oyat bo‘lsa ham yetkazinglar!» degan muborak hadisi sharifga amal qilishga qaratilgan sun’iy yo‘ldosh orqali namoyish etiladigan telekanaldir.
Ushbu kanalning maqsadlari:
1. Odamlarga Alloh azza va jallaning Kitobini sevdirish.
2. Qur’onni o‘rganish va o‘rgatishga qiziqtirish.
3. Qur’oni karimga xizmat qilish uslublarini rivojlantirish.
4. Qur’on hofizlarini xalqqa ko‘rsatish, tanitish, ikrom qilish, jamiyat orasida obro‘-e’tiborlarini yuksaltirish.
5. Odamlarning Qur’onni tushunish salohiyatini, ongini o‘stirish.
6. Odamlarni Qur’onga bog‘lanish, nafsni poklash va Qur’oni hayot kechirishga undash.
7. Qur’on e’jozlari va xossatan, uning ilmiy e’jozi haqida insonlarga ma’lumotlar taqdim etish.
Kanalning maqsadlarini amalga oshirishda quyidagi omillar ishga solinadi:
1. Sahih tilovat va qiroatlarda mohir, puxta bo‘lgan qiroat ustozlarining hayot yo‘llarini namoyish etish.
2. Qur’on ta’limiga ixtisoslashgan turli o‘quv kurslari, markazlar faoliyati haqida hikoya qilish.
3. Go‘zal ovoz sohiblarining tilovatlarini berib borish.
4. Qur’oni karim ta’limi bo‘yicha yangi-yangi uslublar bilan xalqni tanishtirib borish.
5. Qur’oni karim musobaqalari haqida ma’lumot beruvchi reportaj va ko‘rsatuvlar berib borish.
6. Qur’on hofizlari, xususan, kichik bolalar orasidagi g‘aroyib qorilarning mahoratlarini xalqqa namoyish etish.
7. Katta ustozlarning Qur’onni o‘rganish va o‘rgatish borasidagi tajribalaridan xalqni xabardor qilish.
8. Qur’oni karimga har kuni amal qilish bo‘yicha yo‘l-yo‘riq va ko‘rsatmalar, kunlik dasturlarni taqdim etib borish.
9. Qur’onga muhabbatli bolalar, ayollar, ishchilar va boshqa shaxslarning dil so‘zlarini eshittirish.
Ushbu video-suhbatni quyidagi tamosha qilishingiz mumkin.
Tas-ix: https://mover.uz/watch/yBe5CfDm/
Youtube: https://youtu.be/f_DkO_KfOrA
O‘zbekiston musulmonlari idorasi Matbuot xizmati
Kechirim so‘rashga kechikmang
Ba’zan ayb o‘zimizdan o‘tsa-da, kechirim so‘rashga shoshilmaymiz. Xo‘sh, bizni borimizcha suygan, ardoqlagan insonlar bilan arzimas mayda-chuydalar, jilovlanmagan hissiyotlar va soxta g‘urur tufayli devorlar qurayotganimizda, aslida kim g‘olib bo‘ladi?..
Hayot bizga uzoq bir safardek tuyuladi, ammo u aslida juda qisqa. Bugun kimgadir zahringizni sochayotgan, jahl otiga minayotgan bo‘lsangiz, bir lahza to‘xtang... Ertaga o‘sha insonni bag‘ringizga bosish, ovozini eshitish imkoniyatidan butunlay mahrum bo‘lib qolishingiz mumkinligini o‘ylab ko‘ring.
Vaqt — shafqatsiz hakam. Yillar biz o‘ylagandan ham shiddat bilan uchib o‘tadi. Ko‘zni ochib yumguncha bolalarimiz ulg‘ayganini, sochlariga oq oralagan ota-onamizning yanada cho‘kib, keksayib qolganlarini sezmay qolamiz. Va bir kuni... atrofimizni faqat sovuq va sukunat qoplagandagina kech anglaymiz.
Gohida telefoningizga kelgan o‘sha oddiy xabar haqiqatan ham eng oxirgisi bo‘ladi. Gohida «keyin gaplashamiz» deya aytilgan so‘zdan so‘ng, o‘sha «keyin» hech qachon kelmaydi.
Yoningizdagi insonlarning tirikligida, nafas olib turganida qadriga yeting. Ko‘ksingizni to‘ldirib turgan soxta g‘ururni yengib, birinchi bo‘lib qadam tashlang: «Kel, urushmaylik, sen men uchun azizsan», deyishga kuch toping. Chunki bu dunyoda haq bo‘lib chiqishdan ko‘ra armonlarsiz, baxtli yashash muhimroqdir.
Akbarshoh RASULOV
