Yurtimizda barcha sohalar qatori diniy sohada ham ulkan islohotlar amalga oshirilib, muqaddas islom dinini o‘rganish, ajdodlar merosini qayta tiklash va ularni kelajak avlodlarga asl holicha yetkazish bo‘yicha keng ko‘lamli ishlar amalga oshirilmoqda. Xususan, buyuk ajdodlarga munosib vorislarni tayyorlash maqsadida yurtimizda diniy ta’lim tizimini takomillashtirish, ularning uzviyligi va uzluksizligini ta’minlash maqsadida qator islohotlar amalga oshirilmoqda.

Ma’lumki, Movarounnahr zaminidan yetishib chiqqan buyuk muhaddislar Imom Buxoriy, Imom Termiziy, Imom Dorimiy, Abdulloh ibn Muborak, Ibn Hibbon, Haysam ibn Kulayb Shoshiy, Abu Bakr Ahmad ibn Muhammad Barokotiy, Ibrohim ibn Ma’qil Nasafiy va Abd ibn Humayd Keshiylar tomonidan katta hadis maktabiga asos solingan bo‘lib, ushbu ilmu ma’rifat va ziyo maskanlari hadis ilmi rivoji hamda dunyo ilm-fan taraqqiyotida o‘chmas iz qoldirgan.

Prezidentimizning 2018 yil 16 apreldagi “Diniy-ma’rifiy soha faoliyatini tubdan takomillashtirish chora-tadbirlari to‘g‘risida”gi 5416-son Farmoniga asosan islom dini va hadis ilmi rivojiga beqiyos hissa qo‘shgan buyuk ajdodlarimizning boy merosini chuqur o‘rganish, ular tomonidan asos solgan hadis maktablari faoliyatini qayta tiklash va rivojlantirish, ular qoldirgan boy ilmiy merosni o‘rganish, tadqiq qilish orqali xalqimiz va keng jamoatchilikka yetkazish va targ‘ib qilish maqsadida Hadis ilmi maktabini tashkil etilgan edi.

Davlat rahbarining joriy yil 11 yanvar kuni Samarqand viloyatiga tashriflari davomida Hadis ilmi maktabi faoliyatini tashkil etishga oid bergan topshiriqlari ijrosi maqsadida bo‘yicha bir qancha vazifalar amalga oshirildi. Jumladan, 2019 yil 23 martda O‘zbekiston Respublikasi Vazirlar Mahkamasining majlis bayoni va Hadis ilmi maktabi faoliyatini tashkil qilish bo‘yicha Yo‘l xaritasi tasdiqlandi.

Mazkur Yo‘l xaritasiga muvofiq Hadis ilmi maktabi abituriyentlarini yangi o‘quv yiliga qadar puxta tayyorlash, eng munosib abituriantlarni talabalikka kabul qilish maqsadida Toshkent islom institutida ikki haftalik tayyorlov kursi boshlandi.

Ushbu tayyorlov kursida arab tilini puxta o‘zlashtirgan hamda hadislarni yod olishga salohiyati bo‘lgan o‘rta maxsus islom ta’lim muassasalarini bitirgan abituriyentlarga “Arab tili”, “Hadis istilohlari”, “Hadis sharhlari” fanlari bo‘yicha Toshkent islom institutining malakali o‘qituvchilari dars mashg‘ulotlarini olib borishadi.

O‘MI Matbuot xizmati