Oilada er mana shunday bo‘lishi kerak!
Sevikli ayollarini xotirlab, vafo tariqasida uning yaqinlariga hadyalar yuborib turardilar.
Muhabbatlarini izhor qilish uchun ayollari og‘izlarini qo‘ygan joyiga muborak og‘izlarini qo‘yib suv ichardilar, taom yerdilar.
Ayollari bilan kechalari sayr qilib gaplashib yurardilar.
Muborak sochlarini tarash sharafini ayollariga qoldirardilar.
O‘ta sabrli, o‘ta halim er edilar. Hatto bir safar pokiza juftlaridan birlari kundoshi yuborgan, ichida taomi bor laganni rashk sababli bir urib sindirganlarida ham ul zoti bobarakot indamaganlar. Aksincha, yerga to‘kilgan taomni singan laganga yig‘ib, voqeani kuzatib turgan mehmonlarga «Onangiz rashk qildi, taomdan olinglar» deya tabassum qilganlar.
Ul zot juftlarining nozu karashmalariga chidar, erkaliklarini ko‘tarar, ular bilan mutoyiba qilishar, ularga lutfiy muomala qilib, o‘ynashar edilar.
Idishdagi taomdan bir necha luqma ayollarining og‘izlariga solib qo‘yardilar.
Uyda ayollariga go‘zal muomala qilib, ularning ko‘ngillarini ko‘tarar, shodliklariga shodlik qo‘shar, qalb bisotlaridagi shirin so‘zlarini ularga ilinar, uy ishlarida qarashardilar.
Ul zot nafaqat odamlarning, balki Payg‘ambarlarning eng ulug‘i, odamlarga ham, oila a’zolariga ham eng yaxshi muomala qiluvchi, ularga eng ko‘p manfaat keltiruvchi edilar.
Ul zoti bobarakot eng mehribon ota, eng go‘zal er, eng buyuk murabbiy edilar.
Alloh taoloning ul zotga ko‘plab salovot va salomlari bo‘lsin!
Nozimjon Hoshimjon tarjimasi
Registon maydonini Imom al-Moturidiy maqbarasi bilan bog‘laydigan ko‘cha rekonstruksiya qilinmoqda
Samarqandning tarixiy qismida turizm infratuzilmasini keng ko‘lamli yangilash ishlari davom etmoqda. Amalga oshirilayotgan loyihalarning asosiy maqsadi xorijiy sayyohlarning qolish muddatini uzaytirish, qulay shahar muhitini yaratish va bir vaqtning o‘zida mahalliy aholining hayot sifatini oshirishdan iborat.
“Samarkandskiy vestnik” nashriga ko‘ra, turizmni rivojlantirish dasturi doirasida eski shaharning 13 ta ko‘chasi bosqichma-bosqich zamonaviy piyodalar yo‘lagiga aylantirilmoqda. Bu yerda yangi xizmat ko‘rsatish obyektlari barpo etilmoqda, jamoat joylari obodonlashtirilmoqda, milliy me’morchilik an’analarini saqlab qolgan holda muhandislik kommunikatsiyalari va bino fasadlari yangilanmoqda.
Eng yirik loyihalardan biri Registon maydonini Imom al-Moturidiy maqbarasi bilan bog‘laydigan Buxoro ko‘chasini rekonstruksiya qilish bo‘ldi. Ko‘chaning 850 metr qismi to‘liq piyodalar hududiga aylantiriladi. Loyihani ishlab chiquvchilardan biri, Samarqand davlat texnika universiteti o‘qituvchisi Jasur Berdiqulovning ta’kidlashicha, ilgari bu yerda qatnov qismining torligi tufayli muntazam ravishda tirbandliklar yuzaga kelgan, qulay piyodalar yo‘laklarining yo‘qligi esa piyodalar uchun jiddiy noqulayliklar tug‘dirgan. Ishlar yakunlangach, ko‘cha xavfsiz jamoat maydoniga aylanadi. Aholi uchun alohida to‘xtash joyi ajratilgan bo‘lib, transport vositalarining kirishiga faqat zarurat tug‘ilganda maxsus xizmatlarga ruxsat beriladi. Shu bilan birga, suv, gaz, elektr va boshqa muhandislik tarmoqlari to‘liq modernizatsiya qilinmoqda.
Oltin asr mahallasida joylashgan Bag‘dod ko‘chasida ham ishlar davom etmoqda. Bu yerda 600 metrlik hudud obodonlashtirilmoqda. Loyiha doirasida zamonaviy turizm va xizmat ko‘rsatish infratuzilmasini yaratish, kichik biznes va xizmat ko‘rsatish sohasini rivojlantirish ko‘zda tutilgan.
O‘zbekiston musulmonlari idorasi Matbuot xizmati
