Toshkentda yana bir yangi masjid ochildi
Alloh taologa shukrki, joriy yilimiz ko‘plab yangilik, yaxshi xabarlarga boy bo‘lmoqda. Xabaringiz bor, Ramazon oyida Toshkent shahrida “Shayx Muhammad Sodiq Muhammad Yusuf”, “Suzuk ota”, Termiz shahrida “Hakim Termiziy” nomida yangi masjid-majmualar ochilgan edi. Barakotli oydan keyin ham xushxabarlar davom etib, Toshkent shahridagi yana bir masjid davlat ro‘yxatidan o‘tkazilib, o‘z faoliyatini boshladi.
Bugun, 12 iyun kuni Uchtepa tumanidagi “Ko‘rkamobod” mahallasida “Fayzullaxo‘ja o‘g‘li Murodhoji” jome masjidi rasmiy faoliyat boshladi. Masjidning ochilish marosimida O‘zbekiston musulmonlari idorasi raisi, muftiy Usmonxon Alimov hazratlari ishtirok etdilar. Muftiy hazratlari jamoani yangi masjid bilan qutlab, Allohning baytida toat-ibodatlar, solih amallar, Qur’oni karim tilovati Qiyomat qadar davom etishini tiladilar. Shuningdek, tashkiliy ishlarda faollik ko‘rsatgan pok niyatli kishilar haqqiga duolar qildilar.
Aslida, ushbu ibodat uyi 1997 yilda qurilgan bo‘lib, mahalliy masjid sifatida faoliyat yuritib kelgan. Mahallaning jonkuyar kishilari, ko‘pni ko‘rgan keksalari tomonidan masjidni davlat ro‘yxatidan o‘tkazish uchun qilingan sa’y-harakatlar samarasi o‘laroq bugun mahalla ahliga Alloh taolo ushbu mo‘tabar jome masjidni in’om etdi.
– Bizga eng yaqin masjid “Said Vaqqos ota” jome masjidiga qatnash uchun katta yo‘lni kesib o‘tish kerak edi. Bu esa mahalla ahliga, ayniqsa, keksalarga katta qiyinchilik tug‘dirardi. Shunda mahallamizda masjid qurish zarurati borligi uchun faollar bilan bir masjid barpo etishni maslahat qilganmiz. 1997 yilda xalq hashari bilan masjid qurildi, 2006 yilda qayta ta’mirlandi. Alhamdulillah, bugun mutasaddi tashkilotlar murojaatlarimizni ijobiy hal qilib berishdi, - deydi mahalla faoli Saidkarim Sotvoldiyev.
Alloh taboraka va taolo ushbu jome masjidni xalqimizga muborak aylasin, yangi masjidlar sonini yanada ziyoda qilsin.
O‘zbekiston musulmonlari idorasi Masjidlar bo‘limi
O‘zbekiston delegatsiyasi Misrdagi xalqaro anjumanda ishtirok etadi
Joriy yilning 2–3 sentyabr kunlari Qohira shahrida Butunjahon fatvo idoralari va hay’atlari Bosh kotibiyati tashabbusi bilan nufuzli xalqaro anjuman bo‘lib o‘tadi.
Mazkur tadbirda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiligidagi mamlakatimiz delegatsiyasi ishtirok etadi. Ma’lumki, joriy yil iyul oyida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Butunjahon Fatvo idoralari va hay’atlari Bosh kotibiyati a’zoligiga qabul qilingan edilar.
Xalqaro yig‘inda dunyoning taniqli muftiylari, fatvo va fiqh markazlari ulamolari, xalqaro tashkilotlar vakillari, Al-Azhar dorulfununi kabi nufuzli oliygohlar professorlari hamda soha mutaxassislari jam bo‘ladi.
Kun tartibida sun’iy intellekt, jadal raqamlashtirish va zamonaviy bioetika zamonida oila instituti mustahkamligini ta’minlash, ayollar huquqlarini muhofaza qilish, yoshlarni zararli illatlardan asrash hamda ma’naviy inqirozlarga islomiy qadriyatlar asosida shar’iy va ilmiy yechimlar topish masalalari atroflicha muhokama qilinadi.
O‘zbekiston musulmonlari idorasi Matbuot xizmati
