Shayton insonning dushmanidir. U bandani Robbisiga ibodat qilishdan to'sadi. Buning uchun odam bolasini ertayu kech tinmasdan vasvasa qiladi. Qur'oni karimda bunday deyiladi: «U: “Sening izzating ila qasamki, men ularning barchasini ig'vo qilaman. Magar, ulardan xalos qilingan bandalaringgina (ig'voga uchmas)”, dedi» (Sod surasi, 82-83-oyatlar).

Sehrgar shaytonga bo'ysunishi va dindan chiqishi orqali sehr bilan shug'ullana oladi. Qur'oni karimda bunday deyiladi: «Ikkovlari hatto: “Biz fitna–sinov uchunmiz, kofir bo'lmagin”, demasdan oldin hech kimga o'rgatmasdilar» (Baqara surasi, 102-oyat).

Kimki dindan chiqar ekan, jahannamga tushadi. Natijada, shayton o'z maqsadiga erishadi. Chunki uning asl muddaosi – insonlarni butun olamlar Robbiga ibodat qilishdan to'sish, o'rtalariga tafriqa, fitna-fasod, ig'vo urug'larini sochish, oilalarni buzish va h.k. Alloh taolo bunday marhamat qiladi: “Ikkisidan er-xotinning o'rtasini buzadigan narsani o'rganar edilar” (Baqara surasi, 102-oyat).

Davomi bor...

Davron NURMUHAMMAD