Ramazon jo‘nab ketmoqda
Ramazon jo‘nab ketishga tayyorgarlik ko‘rmoqda. U kunlarini yig‘ishtirishni boshladi. Allohim! Bu oyning muattar hididan nafas oldirganing uchun O‘zingga beadad hamd bo‘lsin! Allohim! Ushbu oyga yetkazganingdek, undagi ibodatlarni ham qabul et. Qabulidan mahrum etma! (Doktor Ahmad Iso Ma’saraviy).
Allohim! Bizga bergan va berayotgan barcha: oshkoru maxfiy, zohiru botin, umumiyu xos ne’matlaring uchun O‘zingga hamd, shukru sanolarimiz bo‘lsin!
Allohim! Yana uzoq yillar qalbimiz xotirjam bo‘lgan holda muborak Ramazon oyiga, uning fazilatlariga yetkaz!
"Qasamki, agar (bergan ne’matlarimga) shukr qilsangiz, albatta, (ularni yanada) ziyoda qilurman"(Ibrohim surasi, 7-oyat) deb marhamat qilgan Alloh taolo beadad hamdu sanolar bo‘lsin!
Davron NURMUHAMMAD
Qashqadaryoda imom-xatiblar uchun KPI tizimi bo‘yicha o‘quv mashg‘ulotlari o‘tkazildi
#xabar #Qashqadaryo #KPI
Qashqadaryo viloyatida O‘zbekiston musulmonlari idorasi tomonidan joriy etilgan KPI baholash tizimi doirasida imom-xatiblar uchun navbatdagi o‘quv mashg‘ulotlari tashkil etildi.
Mashg‘ulotlarda mehnat samaradorligini baholash mezonlarini amaliyotga samarali tatbiq etish, ma’naviy-ma’rifiy tadbirlarni sifatli tashkil etish, mahallabay ishlash tizimini takomillashtirish hamda ijtimoiy ko‘makka muhtoj aholi qatlami bilan manzilli ishlash yuzasidan amaliy tavsiyalar berildi.
Shuningdek, KPI tizimidagi har bir ko‘rsatkichning mazmun-mohiyati, hisobotlarni to‘g‘ri yuritish, belgilangan vazifalarni o‘z vaqtida va sifatli bajarish masalalari atroflicha muhokama qilindi. Ochiq muloqotlar davomida ishtirokchilarni qiziqtirgan savollarga mutaxassislar tomonidan batafsil javoblar berildi.
Ta’kidlanganidek, mazkur o‘quvlar diniy soha xodimlarining kasbiy mahorati va amaliy ko‘nikmalarini yanada oshirish, joylardagi ma’naviy-ma’rifiy ishlar samaradorligini yuksaltirish hamda KPI baholash tizimida yuqori natijalarga erishishga xizmat qiladi.
O‘zbekiston musulmonlari idorasi
Qashqadaryo viloyati vakilligi
Matbuot xizmati
