Ramazon oyi sababidan...
Ramazon oyining fazilatlari bisyor. Shulardan uchtasini keltirsak:
- Ramazon oyi xatolarga kafforot bo‘ladi.
Abu Hurayra roziyallohu anhudan rivoyat qilinadi: “Albatta, Rasululloh sollallohu alayhi vasallam: “Besh vaqt namoz, bu jum’a keyingi jum’agacha, bu Ramazon keyingi Ramazongacha – agar katta gunohlardan chetda bo‘lingan bo‘lsa – o‘rtalaridagi narsa (xato)larga kafforot bo‘ladilar” dedilar”. Imom Muslim rivoyati.
- Ramazon oyi gunohlarning kechirilishiga sababdir.
Abu Hurayra roziyallohu anhudan rivoyat qilinadi: “Albatta, Rasululloh sollallohu alayhi vasallam: “Kim Ramazon oyining ro‘zasini iymon bilan, savob umidida tutsa, o‘tgan gunohlari kechiriladi” dedilar”. Imom Buxoriy va Imom Muslim rivoyat qilishgan.
Abu Hurayra roziyallohu anhudan rivoyat qilinadi: “Rasululloh sollallohu alayhi vasallam: “Ramazon oyi kirganda, undan gunohlari kechirilmasdan chiqqan kishining burni yerga ishqalsin” dedilar”. Imom Ahmad, Termiziy, Buxoriy, Ibn Hibbon rivoyat qilishgan.
- Ramazon oyi bandaning Jannatga kirishiga sababdir.
Jobir roziyallohu anhudan rivoyat qilinadi: “Albatta, bir kishi Rasululloh sollallohu alayhi vasallamning oldilariga kelib: “Ey Rasululloh, agar farz namozlarni o‘qisam, Ramazon (ro‘zasini) tutsam, halolni halol, haromni harom desam va bularga hech narsani ziyoda qilmasam, jannatga kiramanmi?” deb so‘radi. Shunda Nabiy sollallohu alayhi vasallam “Ha” dedilar. Imom Muslim rivoyati.
Alloh taolo gunohlarimizni kechirsin va jannatiga mehmon qilsin, omin!
Internet ma’lumotlaridan Nozimjon Iminjonov tarjimasi
Qalblar — idishlardir
Hammod ibn Aqta’ rahimahulloh: “Qalblar — idishlardir. Iymonga to‘la qalbning alomati barcha musulmonlarga nisbatan shafqatli bo‘lish, ularning qayg‘u-tashvishlari bilan yashash hamda ularga manfaat va yaxshilik olib keladigan ishlarda ko‘makdosh bo‘lishdir. Nifoqqa to‘la qalbning alomati esa adovat, nafrat, aldov va hasaddir", dedi.
Ibn Asokir rahimahullohning "Tarixi Dimashq" asaridan