Ramazon — Qur’on oyi!
Qur’onni o‘qib, ma’nolarini tushunish uchun Tafsiri Hilol, Tafsiri Irfonni o‘qib, o‘sha ma’nolar haqida tafakkur qilgan insonning qalbi yaxshi tomonga tez o‘zgaradi.
Tafakkur qilib, qalbida o‘sha ma’no jo bo‘lgandan keyin o‘sha oyatlarning tilovatini ko‘zni yumib eshitilsa, katta o‘zgarish bo‘ladi.
Salafi solihlarimiz Ramazon oyi kelsa, barcha ishlarini to‘xtatib, Qur’onni o‘qishga, o‘qitishga, oyatlari ustida tafakkur, tadabbur qilishga kirishar ekanlar.
Yunus ibn Yazid aytadi: “Ibn Shihob Zuhriy Ramazon oyi kirsa, “Bu oy Qur’on tilovati va taom ulashish oyidir” derdilar”.
Zubayd Yomiy Ramazon oyi kelsa, Mus'hafni olib kelar (ya’ni Qur’onni tilovat qilishga astoydil kirishar) va do‘stlarini ham shu ishga jamlardilar.
Sa’id ibn Jubayr rahimahulloh har ikki kechada Qur’onni xatm qilardilar.
Muhammad ibn Ismoil Buxoriy rahimahulloh Ramazon oyida kunduzi bir xatm, har uch kunda taroveh namozidan keyin yana bir xatm qilar edilar.
Ha, ulug‘larimiz Ramazon oyida Qur’oni Karimga ana shunday muomalada bo‘lardilar. Biz ham Qur’on oyida Qur’onni ko‘proq o‘qiylik, oyatlarining ma’nosi borasida tafakkur qilib, qalbimizni poklashga urinaylik!
Alloh taoloning O‘zi bu borada barchamizga madad bersin!
Nozimjon Iminjonov tayyorladi
Ozarbayjonda muftiylar anjumani boshlandi
Bugun, 14 sentyabr kuni Boku shahrida Turkiy davlatlar muftiylari kengashining navbatdagi VII yig‘ilishi o‘z ishini boshladi.
Anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, Kavkaz musulmonlari idorasi raisi, Shayxulislom Allohshukur Poshshozoda, Turkiya Diyonat ishlari boshqarmasi raisi Safi Arpagush, Qozog‘iston musulmonlari diniy boshqarmasi raisi, bosh muftiy Navro‘zbay hoji Tag‘anuli, Qirg‘iziston musulmonlari diniy nazorati raisi, muftiy Abdulaziz qori Zakirov hamda boshqa qardosh va xorijiy davlatlar ulamolaridan iborat nufuzli delegatsiyalar ishtirok etmoqda.
Yalpi majlisda nutq so‘zlagan muftiylar o‘z ma’ruzalarida quyidagi ustuvor yo‘nalishlarga alohida e’tibor qaratmoqdalar:
– Kengash qoshidagi Fatvo hay’ati faoliyatini rivojlantirish, ummat uchun zarur qo‘shma fatvolar ishlab chiqish va zamonaviy masalalarga shar’iy yechim topish;
– diniy ta’lim muassasalarida ustoz va talabalar almashinuvini yo‘lga qo‘yish, ilmiy-uslubiy loyihalarni amalga oshirish;
– ekstremizm, terrorizm, takfirchilik, islomofobiya va mazhablararo nizo qo‘zg‘ash kabi tahdidlarga qarshi yakdil ma’rifiy kurashni kuchaytirish.
Shuningdek, Ulamolar diniy-ma’rifiy sohadagi ana shunday hamkorlik butun Turkiy dunyo birdamligini mustahkamlashga xizmat qilishini ta’kidladilar.
Anjuman davom etmoqda.
O‘zbekiston musulmonlari idorasi Matbuot xizmati
