"The Telegraph": O'zbekistonni kashf etish vaqti nega aynan hozir?
Britaniyada nashr etiladigan nufuzli «The Telegraph» kundalik gazetasida «U Dubayga aylanishidan oldin O'zbekistonni kashf etish vaqti nega aynan hozir?» sarlavhali maqola bosilib chiqdi, deb xabar bermoqda «Dunyo» AA muxbiri. Unda muallif Jeyms Dreven mamlakatimiz bo'ylab amalga oshirgan sayohati haqidagi taassurotlarini o'quvchilar bilan o'rtoqlashgan.
Uning qayd etishicha, O'zbekiston jahonning 90 davlati fuqarolari uchun vizasiz rejimni o'rnatgan bo'lib, bu mamlakat xarakterini butunlay o'zgartirishi mumkin bo'lgan rejaning bir qismi hisoblanadi.
Britaniyalik jurnalistning O'zbekiston bo'ylab sayohati Samarqanddan boshlangan. Uning yozishicha, bu erda XIV asrdan XX asrgacha bo'lgan Markaziy Osiyo me'morchiligining eng sara namunalari qaror topgan.
«Samarqand nafaqat O'zbekistondagi, balki butun Markaziy Osiyodagi eng ko'hna shaharlardan biri bo'lib, uning tarixi eramizdan oldingi 1500 yillarga to'g'ri keladi. Hunarmandchilik ishlab chiqarishi bilan mashhur bo'lgan bu afsonaviy kent Buyuk Ipak yo'lidagi eng muhim chorrahalardan biri bo'lib, II asrdayoq Yevroosiyoni zamonaviy Hitoyning sharqidan Turkiyaning g'arbiy qismigacha kesib o'tgan, ipak, ziravor va boshqa turli mahsulotlar tashiladigan savdo yo'llarining tarmog'i bo'lgan. Ikki ming yil davomida butun dunyodan savdogarlarni jalb qilgan Samarqand allaqachon YuNYeSKO tomonidan jahon madaniyati chorrahasi sifatida e'tirof etilgan», deb yozadi muallif.
U mamlakatimizning mustaqil rivojlanish tarixi haqida yozar ekan, 2016 yildan boshlab mamlakatimiz taraqqiyotning yangi yo'liga chiqqanini alohida qayd etadi.
«Prezident Shavkat Mirziyoev sud-huquq islohotlarini tezkorlik bilan amalga oshirgani barobarida mamlakatni turizm va xorijiy investitsiyalar uchun ham ochdi. 2020 yil boshida BMTning Jahon sayyohlik tashkiloti (YuNVTO) O'zbekistonni sayyohlikning o'sishi bo'yicha to'rtinchi mamlakat, deb topdi», deb yozadi Jeyms Dreven.
Britaniyalik jurnalistning fikricha, O'zbekistondagi zamonaviy taraqqiyot mamlakatning boy tarixi va merosini o'zida mujassam etgan.
"Samarqand aeroporti terminali binosi XV asrning buyuk astronomi, shaharning eng mashhur tarixiy siymosi hisoblanadigan Ulug'bekning ochiq kitobini («Ziji Ko'ragoniy» asari) eslatib turadi», deb yozadi u.
Shuningdek, ushbu maqolada Samarqand shahrida bunyod etilgan «Boqiy shahar» majmuasi, Registon maydoni, xorijlik sayyohlar uchun yaratilgan zamonaviy qulayliklarga oid muhim ma'lumotlar ham o'quvchilarning e'tiboriga havola qilingan.
O'zbekiston musulmonlari idorasi
Matbuot xizmati
Toshkentda Malayziya xalqaro Halal Fest ko‘rgazmasi o‘kazilishi rejalashtirilmoqda
O‘zbekiston va Malayziya o‘rtasida halol sanoati yo‘nalishidagi hamkorlik yangi bosqichga chiqmoqda. Qishloq xo‘jaligi vazirligida bo‘lib o‘tgan uchrashuvda ikki mamlakat vakillari “Malaysia–Uzbekistan International Halal Fest 2027” xalqaro forumi va ko‘rgazmasini Toshkent shahrida o‘tkazish istiqbollarini muhokama qildilar.
Malayziyaning TWOJ CREATIVE SDN BHD kompaniyasi delegatsiyasi tomonidan taqdim etilgan loyiha halol sanoati ekotizimini rivojlantirish, xalqaro biznes aloqalarini mustahkamlash hamda yangi investitsiya loyihalarini shakllantirishga qaratilgani bilan ahamiyatlidir.
Rejalashtirilayotgan festival doirasida xalqaro ko‘rgazma, biznes-forum va B2B uchrashuvlari, halol oziq-ovqat, turizm, moliya hamda ishlab chiqarish yo‘nalishlariga bag‘ishlangan maxsus ekspozitsiyalar, investitsiya sessiyalari, madaniy dasturlar va mahsulotlar taqdimotlarini tashkil etish ko‘zda tutilmoqda. Ushbu tadbir O‘zbekistonning halol mahsulotlar bozoridagi salohiyatini namoyish etish va mahalliy ishlab chiqaruvchilar uchun yangi eksport imkoniyatlarini yaratishga xizmat qilishi kutilmoqda.
Muzokaralar davomida JAKIM standartlari asosida halol sertifikatlashtirish tizimini rivojlantirish, mahalliy ishlab chiqaruvchilarni xalqaro bozorlarga olib chiqish, fermer va tadbirkorlar uchun o‘quv-seminarlar hamda malaka oshirish dasturlarini tashkil etish masalalari ham muhokama qilindi.
Tomonlar festivalni yuqori saviyada tashkil etish maqsadida tegishli vazirlik va idoralar, oliy ta’lim muassasalari, biznes hamjamiyati hamda tarmoq uyushmalarini jalb etgan holda qo‘shma “Yo‘l xaritasi”ni ishlab chiqishga kelishib oldilar.
Mutaxassislarning fikricha, “Malaysia–Uzbekistan International Halal Fest 2027” nafaqat ikki mamlakat o‘rtasidagi savdo-iqtisodiy aloqalarni mustahkamlaydi, balki investitsiyalarni jalb etish, halol sanoati infratuzilmasini rivojlantirish va oziq-ovqat xavfsizligini ta’minlash yo‘nalishidagi hamkorlikni yangi bosqichga olib chiqadigan muhim xalqaro maydonga aylanishi kutilmoqda.
O‘zbekiston musulmonlari idorasi Matbuot xizmati
