Ramazonda Alloh rahmatining ko‘rinishlari
Muborak Ramazon oyi Alloh taolo boshqa oylardan afzal qilgan, xoslagan oydir. Bu oyda Qur’oni karim odamlarga hidoyat o‘laroq, hidoyat dalillari o‘laroq nozil bo‘lgan. Bu oyda Alloh taolo nazdida eng afzal kecha – Laylatul qadr bor. Bu oyda ilohiy rahmatlar nozil bo‘ladi, musulmonlar poklanadi. Bu oy – ilohiy mukofotlarga ega bo‘linadigan mavsumdir. Uning birinchi o‘n kunida Alloh taolo o‘z bandalarini rahmatiga doxil qiladi, o‘rtasida ularni mag‘firat qiladi. Zero, bu oyda bandalarining O‘zining roziligini istab kunduzlari ro‘zador, kechalari namoz bilan qoim bo‘lganlarini ko‘rib, ularni mag‘firat qiladi. Bu oyning uchinchi o‘n kunligida esa, Alloh taolo bandalarini do‘zaxdan ozod etadi.
Musulmon kishi bu oyda Alloh taoloning o‘z bandalariga tushirgan rahmatini his qiladi. Bu rahmat quyidagi ishlarda ko‘rinadi:
- Shaytonlarning kishanlanishi. Bu oyda jannat eshiklari ochiladi, do‘zax eshiklari yopiladi, shaytonlar kishanlanadi. Shubhasiz, bu Alloh taoloning bandalariga rahmatidir. Chunki shaytonlar kishanlanishi, vasvasa qilishdan tiyilishlari bandalarga ro‘za tutishlariga, kechalari qoim bo‘lishlariga yordam bo‘ladi. Bu ishni taqvodorlar, xususan, to‘g‘ri ro‘za tutishga mukammal tayyorgarlik ko‘rganlar his etadilar.
- Tavba eshiklarining ochilishi. Alloh taoloning tavba eshigi tavba qilishni, istig‘for aytishni istagan gunohkor bandalar uchun doimo ochiqdir. Ammo bu oydagi tavba boshqa oylardagi tavbadan afzaldir. Bunga sabab – bu oyda nozil bo‘ladigan ilohiy rahmatlar, farishalarning zikr va ibodat bo‘layotgan joylarda hozir bo‘lishlaridir.
- Ajr-savoblarning bir necha bor ko‘paytirib berilishi. Musulmon biladiki, Alloh taolo unga bir yaxshiligiga o‘n barobar ko‘p savob beradi. Lekin bu oyda bir yaxshi ishga boshqa oylarga qaraganda yetmish barobar ko‘p savob yoziladi. Bu ham Alloh taoloning bandalariga ne’mati, fazlidir. Bu bilan bandalarning darajalari yanada ko‘tariladi, allohning rahmatiga noyil bo‘ladilar.
- Shuningdek, oyda bandalar bir-birlariga zakot va sadaqa berib, yordam ko‘rsatishlari, qiynalganlarning muammo va tashvishlari bartaraf bo‘lishi, ro‘zadorlarga iftorliklar tashkil qilinishi bilan ham ajralib turadi. Hadisi sharifda Rasululloh (sollallohu alayhi va sallam) aytadilar: “Kim bir ro‘zadorga iftor qilib bersa, unga ham ro‘zadorga berilgancha savob beriladi. Bunda ro‘zadorning savobidan zarracha kamaytirilmaydi” (Imom Termiziy rifoyati).
Abdurasul QAYUMOV,
Toshkent shahar Chilonzor tumani
“Muhsinxon to‘ra eshon” jome masjidi
imom-xatibi
Imom-xatiblar: «Islom sivilizatsiyasi markazi Uchinchi Renessans g‘oyasining amaliy ifodasi»
O‘zbekistonda Uchinchi Renessans g‘oyasini hayotga tatbiq etish, milliy va diniy merosni chuqur o‘rganish hamda ma’naviy-ma’rifiy bilimlarni kengaytirishga qaratilgan tashabbuslar doirasida Farg‘ona, Qashqadaryo va boshqa hududlardan kelgan imom-xatiblar O‘zbekistondagi Islom sivilizatsiyasi markazida bo‘ldilar. Ular Markazdagi muzey ekspozitsiyalari, noyob qo‘lyozmalar, Renessans davrlariga bag‘ishlangan bo‘limlar va zamonaviy interaktiv yechimlar bilan tanishib, ushbu maskanni ilm, ta’lim va ma’naviyatni uyg‘unlashtirgan muhim milliy platforma sifatida baholadilar, xabar bermoqda iccu.uz.
Farg‘ona viloyati Buvayda tumani «Katta mahalla» masjidi imom-xatibi Rahmatulloh G‘oyibnazarov Prezident Shavkat Mirziyoyev tashabbusi bilan barpo etilgan mazkur Markazni yosh avlod uchun muhim ma’rifat maskani sifatida baholadi.
«Bu yerda Birinchi va Ikkinchi Renessans davrlari, buyuk allomalarimiz qoldirgan ilmiy meros va mamlakatimiz taraqqiyoti haqidagi ekspozitsiyalarni ko‘rib katta taassurot oldik. Bu yerga kelgan har bir inson o‘z tarixini chuqurroq anglaydi, yoshlar esa ilmga va vatanparvarlikka yanada ko‘proq intiladi. Bu yerda olgan bilim va taassurotlarimizni xalqimizga yetkazishni o‘zimizga vazifa deb bilamiz», — dedi u.
Farg‘ona viloyati Qo‘shtepa tumani bosh imom-xatibi, «Muborak» jome masjidi imom-xatibi Otabek Xolmurodov Markaz kutubxonasida ilmiy izlanishlar uchun yaratilgan sharoitlarga e’tibor qaratdi.
Uning ta’kidlashicha, elektron kitoblar fondi, Brayl alifbosidagi adabiyotlar, maxsus tadqiqot xonalari va noyob manbalarning bir joyda jamlangani Markazni nafaqat muzey, balki keng qamrovli ilmiy resurs markaziga aylantirgan.
«Bu kutubxona ilmiy izlanish bilan shug‘ullanuvchilar uchun haqiqiy bilim maskani ekan. Bu yerda yaratilgan sharoitlar ilm ahlini yanada ko‘proq izlanishga undaydi. Biz bu imkoniyatlar haqida yoshlarimizga albatta targ‘ibot olib boramiz», — dedi u.
Farg‘ona viloyati Bag‘dod tumani bosh imom-xatibi Ahmadxon Nizomov esa Markazning ilmiy konsepsiyasiga alohida to‘xtaldi.
Uning fikricha, har bir ekspozitsiya ortida keng ko‘lamli tadqiqotlar va ilmiy izlanishlar mujassam bo‘lib, bu yerdagi interaktiv muhit tashrif buyuruvchilarni faqat tomoshabin emas, balki izlanuvchiga aylantiradi.
«Bu yerga bir marta kelib barchasini to‘liq anglash qiyin. Har bir ekspozitsiya ortida katta ilmiy mehnat mujassam. Ayniqsa, allomalarimiz merosi, tadqiqot markazlari va interaktiv imkoniyatlar insonni yanada chuqur izlanishga chorlaydi. Bu maskan kelajak avlod uchun ulkan ma’naviy boylik va Yangi O‘zbekistonning ilm-fan taraqqiyotiga xizmat qiladigan muhim poydevordir», — dedi u.
Tashrif yakunida ishtirokchilar Markazda jamlangan boy ilmiy va madaniy meros, raqamli ekspozitsiyalar hamda ta’lim imkoniyatlarini keng jamoatchilik, ayniqsa yoshlar o‘rtasida targ‘ib qilish Uchinchi Renessans g‘oyalarini hayotga tatbiq etish, milliy o‘zlikni anglash va ilmiy merosga qiziqishni yanada kuchaytirishga xizmat qilishini qayd etdilar.
O‘zbekiston musulmonlari idorasi Matbuot xizmati
