Muftiy hazrat Vashingtondagi musulmonlar bilan uchrashdi
O‘zbekiston musulmonlari idorasi raisi, muftiy Usmonxon Alimov hazratlari AQSHga qilgan safarlari davomida Vashington shahridagi eng qadimiy masjid hisoblangan “Muhammad” nomli jomeda mo‘min-musulmonlar bilan dildan muloqot qildilar.
Muftiy hazratlari AQSHlik mo‘min-musulmonlarni Ramazon oyi bilan muborakbod etib, O‘zbekiston zaminidan yetishib chiqqan buyuk allomalar, ularning ilmiy meroslarining jahon ilm-fani rivojidagi o‘rni, muhtaram Prezidentimiz rahnamoliklarida diniy-ma’rifiy sohada olib borilayotgan islohotlar, yurtimiz mo‘min-musulmonlarining turmush hayoti, yangi ochilayotgan masjid-madrasalar va ilmiy maktablar faoliyati haqida batafsil so‘zlab berdilar.
Ushbu jome imom-xatibi Tolib Sharif janoblari o‘zaro muloqotda o‘tgan yili O‘zbekistonga tashrif buyurgani, diniy-ma’rifiy sohada amalga oshirilayotgan ijobiy ishlarni o‘z ko‘zi bilan ko‘rgani, haqiqatan, musulmon olamida O‘zbekiston yetakchi davlatlardan biri ekanini bildirdi.
“Muhammad” nomli jome masjid joylashgan hududda Islom ma’rifatini keng yoyish, mo‘min-musulmonlarning diniy ehtiyojlarini qondirish va tashkilotlarda islomiy tushunchalarni yetkazishda Imom Tolib Sharif janoblarining xizmatlari juda katta ekani ko‘pchilikka ma’lum.
Ma’lumot o‘rnida, “Muhammad” masjidi 1930 yilda barpo etilgan AQSH poytaxti Vashingtondagi eng qadimiy masjid hisoblanadi. Ushbu masjid joylashgan hududda juda ko‘p musulmonlar istiqomat qiladi. Shahar chetida masjidga qarashli yordamchi xo‘jaliklar va vaqf yerlari ham mavjud bo‘lib, tushgan daromadlar ushbu masjid va mo‘min musulmonlar ehtiyojlari uchun sarflanadi. Juma kunlari masjidga 500-600 namozxon tashrif buyuradi. Mashhur bokschi, jahon chempioni Muhammad Ali ham ushbu masjid qavmidan bo‘lgan.
Ushbu jome “Millat masjidi” va “Vashington masjidi” nomlari bilan ham mashhurdir. Masjid uzoq yillar shahar, tuman va Kolumbiya okrugining, qolaversa qator masjidlarning eng yirigi hisoblangan. Din Muhammad ismli alloma ushbu masjidga dastlabki imomlik qilganlardan biridir. U faoliyati davomida millionlab musulmonlarning og‘irini yengil qilish, ijtimoiy qo‘llab-quvvatlash kabi ishlarni bajargan.
O‘zbekiston delegatsiyasining AQSH safari davom etmoqda, jarayonlarni saytimizda kuzating.
O‘zbekiston musulmonlari idorasi Matbuot xizmati
“Solombo Times”: O‘zbekistonda “Uchinchi Renessans” g‘oyasini amalga oshirish davlat siyosatiga aylangan
Shri-Lankaning “Solombo Times” nashrida “O‘zbekistonda Yangi uyg‘onish davri: kelajak texnologiyalari yordamida buyuk o‘tmishni qayta tiklash” sarlavhali tahliliy maqola e’lon qilindi, deb xabar bermoqda “Dunyo” AA.
Shri-Lankalik taniqli jurnalist Fazan Navaz tomonidan yozilgan ushbu materialda so‘nggi o‘n yilda O‘zbekistonda Prezident Shavkat Mirziyoyev tashabbusi bilan Yangi O‘zbekistonni bunyod etish, “Uchinchi Renessans” g‘oyasini amalga oshirishga qaratilgan islohotlar va ularning samarali natijalari xususida so‘z yuritilgan.
Muallifning yozishicha, Markaziy Osiyo markazida sokin, ammo ulkan ahamiyatga ega inqilob yuz bermoqda. Bu kurash qurol-yarog‘ bilan emas, balki qo‘lyozmalar, muzeylar va mikrochiplar yordamida amalga oshirilmoqda.
Prezident Shavkat Mirziyoyev rahbarligida O‘zbekiston Samarqand va Buxoro kabi shaharlar jahon ilm-fani, she’riyati va falsafasining yetakchi markazlari bo‘lgan O‘rta asrlardagi “Oltin asr” shon-shuhratini qayta tiklashga intilmoqda.
Bu jarayonning o‘ziga xos jihati shundaki, O‘zbekiston ming yildan ziyod tarixga ega madaniy merosni asrash, qayta tiklash va keng ommaga yetkazish uchun sun’iy intellekt hamda raqamli texnologiyalardan faol foydalanmoqda.
Nashrda O‘zbekistonning boy madaniy va tarixiy merosi hamda uni saqlash bo‘yicha islohotlarga to‘xtalib o‘tilgan. Qayd etilganidek, bu zamin insoniyat tarixidagi eng buyuk allomalarga beshik bo‘lgan. Astronom va davlat arbobi Mirzo Ulug‘bek Samarqandda yulduzlarni hayratlanarli darajada aniq kuzatish imkonini bergan rasadxona barpo etgan. Xorazmdagi Ma’mun akademiyasi olimlari esa Yevropada Renessans boshlanishidan ancha avval matematika va tibbiyot sohalarida yuksak yutuqlarga erishgan edi.
O‘zbekiston yetakchisi bu tarixiy merosni tez-tez tilga olib, Mirzo Ulug‘bekni nafaqat buyuk olim, balki ilm-fanni eng yuksak qadriyat deb bilgan davlat arbobi sifatida ta’riflaydi. Davlat rahbari bugungi yangilanish jarayonini “Uchinchi Renessans” deb atab, uni O‘zbekistonning ilmu ma’rifat va madaniyat markazi sifatidagi mavqeini qayta tiklashga qaratilgan umummilliy loyiha sifatida baholaydi. Tarixchilar ta’biri bilan aytganda – bu atama mintaqada avval mavjud bo‘lgan ikki buyuk yuksalish davridan keyingi navbatdagi uyg‘onish bosqichini anglatadi.
Muallifning fikricha, O‘zbekistonda Uchinchi Renessans g‘oyasini amalga oshirish shunchaki gap emas, balki davlat siyosatiga aylangan.
“Bu ulkan maqsadning eng yorqin ramzi joriy yil Toshkentda qad rostlagan Islom sivilizatsiyasi markazidir. 2026 yil mart oyida 40 mamlakatdan tashrif buyurgan 1500 dan ortiq mutaxassis ishtirokida qurib bitkazilgan mazkur markaz o‘z bag‘rida islom olamining eng noyob yodgorliklaridan biri – VII asrga mansub Usmon Mus'hafini saqlaydi. Shuningdek, bu yerda ilmiy laboratoriyalar, restavratsiya ustaxonalari va arxivlar faoliyat yuritadi. Markaz allaqachon dunyodagi eng chiroyli yangi muzeylardan biri sifatida e’tirof etilgan”, – deya qayd etgan jurnalist.
Materialda ta’kidlanishicha, O‘zbekiston yondashuvining boshqalardan ajratib turadigan muhim jihati – bu sun’iy intellektdan iqtisodiy taraqqiyot vositasi sifatidagina emas, balki madaniy merosni muhofaza qilish vositasi sifatida ham foydalayotganidadir.
Sun’iy intellekt turizm sohasini ham tubdan o‘zgartirmoqda. Bu tashabbus 2026 yilda mamlakatga 12 million sayyohni jalb qilish rejasining bir qismi hisoblanadi.
Fazan Navaz o‘z maqolasini “Uchinchi Renessans” o‘z oldiga qo‘ygan maqsadlarga to‘liq erishadimi-yo‘qmi, buni vaqt ko‘rsatadi. Biroq bugunning o‘zidayoq O‘zbekiston qanday yo‘ldan odimlab borayotgani aniq ko‘rinib turibdi”, – degan so‘zlar bilan yakunlagan.
O‘zbekiston musulmonlari idorasi Matbuot xizmati
