Tanlovga!
Ramazon xayr-baraka oyidir. Chunki, bu oyda qilingan har bir nafl ibodat uchun farz amalining savobi, bitta farz amali uchun esa, boshqa oyda qilingan yetmishta farz amalining savobi beriladi. Shuning uchun Musulmonlar bu oyda Alloh taologa yoqadigan va uni rozi qiladigan amallarga shoshiladilar.
Quyida bu oyda qilinadigan eng afzal amallarni sanab o‘tamiz:
- Ro‘za tutishlik. Ro‘za tutishlik faqatgina yeb-ichishdan tiyilish emas, balki har qanday ma’siyatlar va yolg‘on, tuhmat va g‘iybat kabi Allohning g‘azabini keltiradigan amallardan ham uzoq bo‘lish lozim.
- Qur’on tilovat qilish. Bu oyda Qur’on tilovat qilish Alloh taologa eng mahbub ishlardandir.
- Namozlarni ko‘paytirish. Farz bo‘lgan 5 mahal namozdan tashqari, sunnat va nafl ibodatlarini ham ko‘paytirish lozim. Xususan, jamoat bilan o‘qiladigan Taroveh namozlarni g‘animat bilish kerak.
- Silai-rahm qilish. Yaqinlar va qarindoshlarni ziyorat qilish. Chunki bunday amallar kishilar o‘rtasida o‘zaro muhabbat rishtalarini mustahkamlaydi.
- Xayr-ehson qilish. Bu oyda sadaqa qilish – eng afzal ishlardan bo‘lib, Alloh taolo bu amalni qiluvchini O‘zi mukofotlaydi. Shuningdek, Rosululloh sollallohu alayhi vasallam bu oyda boshqa oylardan ko‘ra saxiyroq bo‘lar edilar.
- Zikrlarni ko‘paytirish. Bu oyda qilinadigan zikr, tasbeh va istig‘for uchun ko‘p savob beriladi. Bundan tashqari, bunday amallar yomonlik eshiklarini yopib, mag‘firat eshiklarini ochadi va qalbni xotirjam qiladi. Hamda nafsni harom ishlardan uzoq qiladi.
- Zakot berish. Musulmonlar bu oyda zakotlarini faqir va miskinlarga beradilar.
- E’tikof o‘tirish. Bu oyda musulmonlar ko‘proq vaqtlarini masjidlarda namoz o‘qish, Qur’on tilovat qilish va Alloh taoloni zikr qilish bilan o‘tkazishga haris bo‘lishlari lozim. Asosan, Ramazonning oxirgi kunlarida. Chunki, Rosululloh sollallohu alayhi vasallam Ramazonning oxirgi o‘n kunligida e’tikof o‘tirar edilar.
- Laylatul qadr kechasini bedor o‘tkazish. Rasululloh sollallohu alayhi vasallam sahobalarini Laylatul qadrni topishga va uni bedor o‘tkazishga undar edilar. Chunki, Alloh taolo bu kunning qadrini boshqa kunlarning mingtasidan afzal qilgan.
- Quyosh chiqqunicha masjidda o‘tirish. Bomdod namozidan so‘ng to quyosh chiqquncha masjidda o‘tirish mustahab amal hisoblanadi. Chunki, Rosululloh sollallohu alayhi vasallam sahobalarni shunday qilishga chaqirar edilar.
- Ramazon kunlarida Umra ziyoratini qilish. Chunki, bu oyda qilingan Umra Haj ibodatiga tenglashtiriladi.
Alloh taolo barchamizni bu oyda shunday fazilatli amallarni bajarishga muvaffaq aylasin.
Toshkent Islom instituti talabasi
Muhammad Ali Muhyiddin
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
