Dindoshlarimizga tavsiyalar
Tanlovga!
Bismillahir Rohmanir Rohiym
Osmonlar va yerni, va undagi jamiki maxluqotlarni yaratgan buyuk Zotga hamd-u sanolar, payg‘ambarimiz Muhammad Mustafo sollallohu alayhi va sallamga salovot-u salomlar bo‘lsin!
Mana bizni yil bo‘yi sog‘intirib, o‘zi ham bizni sog‘inganidan o‘tgan yilgi vaqtidan 12 kun ilgarilab Ramazoni sharif kirib keldi.
Men hadis bilimdoni emasman, diniy saviyam o‘ziga yarasha, shu jumladan Ramazon oyi haqida ham bilimlarim unchalik serob emas. Ushbu fikrlarim jamlanmasini shunchaki Ramazon ro‘zasini aslida nima uchun tutayotganini anglamayotgan tengdoshlarimga yordam bo‘lishi uchun yozdim.
Yoshligimdan fikr-u xayolimga muqim o‘rnashgan bir tuyg‘u bor, bu ham bo‘lsa padarim tomonidan anglatilgan qilgan barcha amallarimizning Alloh uchun bo‘lishi lozimligidir. Afsuslar bo‘lsinki, juda ko‘pchilik yoshlarda qilayotgan amallarini kim uchun bajarilayotganligini anglamaslik hodisasi uchraydi. Maktabda o‘qib yurgan kezlarim, namoz va ro‘za ibodatlarini ado qilishni boshlaganimning ilk yillarida maktabda kimdir mening ro‘zador ekanligimni bilib qolishidan juda qo‘rqardim, chunki hech kim buni to‘g‘ri qabul qilmasdi. Allohga hamdlar bo‘lsinki, hozir tengdoshlarimizning juda ko‘pchiligi Ramazon ro‘zasini to‘liq ado qilishga urinishadi. Ammo bu ibodatni Alloh farz qilgani uchun emas, balki o‘zlarining biror hojatlari yechim topishligi umidida qilishayotgani juda ayanchlidir.
Ayrim tengdoshlarimizning oliy maqsad deb bilganlari – talabalik baxti nasib qilishi umidida, boshqalari uylarida tinchlik bo‘lishi va yaxshi xonadonga kelin bo‘lishlik orzusida, eng achinarlisi, ko‘pchilik dugonalarimizning tanalaridan ortiqcha vaznni yo‘qotish va go‘zal qomat egasi bo‘lish niyatida Ramazon ro‘zasini tutib berishayotganini ko‘rib beixtiyor yoqa ushlaymiz.
Qadrli tengdoshlar, aqlim yetganicha sizlarga fikrlarimni anglatayin, unutmangki, Alloh hammasini ko‘rib turibdi, hatto xayolimizdan o‘tgan tuyg‘ular ham Unga ayondir. shunday ekan, keling endi biz ham xuddi payg‘ambarimiz Muhammad alayhissalom aytganlaridek, Alloh uchun, savob umidida ro‘zani ado qilaylik. Keling, qalbimizni to‘lig‘icha Allohga bog‘laymiz, va o‘zimiz kutmaganimiz bir holda iymonga, baxtga, ilmga, va asosiysi, xotirjamlik ne’matiga ega bo‘laylik.
shu o‘rinda yana bir gapni aytib o‘tmoqchiman. Ramazon oyi kirganidan buyon eshitayotgan savollarim orasida “Ramazonda labimiz yoki boshqa a’zolarimizga bo‘yoq qo‘yish mumkinmi” qabilidagi savoldir. Bu haqda ma’lumot izlab hech qanday yechim topolmadim. shu sabab o‘z fikrimni qisqacha aytib o‘tmoqchiman.
Qadrli dugonajonlar, biz uchun ro‘zador bo‘lmagan holatimizda Alloh bergan tanamizni biror vosita orqali boshqacha qilib ko‘rsatishimiz qaytarilgan bir holatda, Ramazonda bu ish qanday qilib to‘g‘ri bo‘la oladi?! Unutmangki, oddiylik go‘zallikdir, biz qalbimizni go‘zal qilaylik, Alloh yuzimizni o‘zi go‘zal qilib qo‘yadi, InshaAlloh!!
Muborak Ramazon oyi barchangizga qutlug‘ bo‘lsin ahli musulmon!!!
Robiyaxon
Mehr-saxovat va inson qadri — ezgulikka yo‘g‘rilgan xayrli tashabbus
Insonga mehr ko‘rsatish, muhtojning holidan xabar olish, bemorga tasalli berish va ehtiyojmandlarga ko‘mak qo‘lini cho‘zish xalqimiz ma’naviyatining azaliy fazilatlaridandir. Islom ta’limotida ham saxovat, mehr-oqibat va inson qadrini ulug‘lash eng ulug‘ amallardan biri sifatida e’tirof etilgan. Chunki bir insonning ko‘nglini ko‘tarish, uning qalbiga umid va ishonch bag‘ishlash jamiyatda mehr-muhabbat, hamjihatlik va totuvlikni mustahkamlaydi.
Shu ezgu qadriyatlarni hayotga tatbiq etish, aholining ehtiyojmand qatlamlarini qo‘llab-quvvatlash va yurtdoshlarimiz qalbida mehr-shafqat tuyg‘ularini yanada kuchaytirish maqsadida 2026 yil 13 avgust kuni Samarqand viloyati Urgut tumanida keng ko‘lamli ma’naviy-ma’rifiy hamda xayr-saxovat tadbirlari o‘tkazildi.
Mazkur xayrli tadbirlarda Samarqand viloyati bosh imom-xatibi vazifasini vaqtincha bajaruvchi Nursultonxon domla Abdumannonov, viloyat bosh imom-xatibi o‘rinbosari Xayrullo domla Sattarov, VAQF xayriya jamoat fondi Samarqand viloyati filiali rahbari Yoqubjon domla Mansurov, uning o‘rinbosari A.Sultonov, shahar va tuman bosh imom-xatiblari, «Haj–2026» ziyoratchilari, mahalla faollari va nuroniylar ishtirok etdilar.
O‘zbekiston Respublikasi davlat mustaqilligining 35 yilligi munosabati bilan o‘tkazilgan ushbu xayrli aksiya doirasida ijtimoiy himoyaga muhtoj, kam ta’minlangan va boquvchisidan ayrilgan 300 ta oila holidan xabar olindi. Ularning xonadonlariga tashrif buyurilib, turmush sharoitlari o‘rganildi, oilalarga zarur oziq-ovqat mahsulotlari yetkazib berildi.
Tashriflar davomida bemor va keksalarning holidan xabar olinib, ular bilan samimiy suhbatlar o‘tkazildi. Ularning haqqiga shifo, xonadonlariga fayzu baraka, yurtimizga tinchlik-xotirjamlik tilab duolar qilindi. Zero, muhtojning ko‘nglini ko‘tarish va uni yolg‘iz emasligini his ettirish ham insonparvarlikning yuksak ko‘rinishidir.
Shu bilan birga, hayotida turli ijtimoiy qiyinchiliklarga duch kelgan hamda yot g‘oyalar ta’siriga tushib qolish xavfi mavjud bo‘lgan ayrim fuqarolar bilan yakka tartibda muloqotlar tashkil etildi. Suhbatlarda sof e’tiqod, oila muqaddasligi, farzand tarbiyasi, halol mehnat, Vatanga sadoqat, milliy va diniy qadriyatlarga hurmat, shuningdek, turli buzg‘unchi g‘oyalarga nisbatan ma’naviy immunitetni mustahkamlash masalalari hayotiy misollar asosida tushuntirildi.
Tadbirlar doirasida Urgut tumanidagi jome masjidlarda peshin namozidan so‘ng ma’naviy-ma’rifiy uchrashuvlar ham o‘tkazildi. Ularda mehr-oqibat, qo‘ni-qo‘shnichilik munosabatlarini mustahkamlash, yoshlarni milliy va diniy qadriyatlarga sodiqlik ruhida tarbiyalash, oila tinchligini asrash, jamiyatda o‘zaro hurmat va ahillik muhitini qaror toptirish kabi dolzarb mavzular atroflicha yoritildi.
Uchrashuvlar yakunida mamlakatimiz tinchligi, xalqimiz farovonligi, Vatanimiz ravnaqi va yosh avlodning ilmli, odobli hamda vatanparvar insonlar bo‘lib voyaga yetishi haqida xayrli duolar qilindi.
Bugun yurtimizda inson qadrini ulug‘lash, aholining ehtiyojmand qatlamlarini har tomonlama qo‘llab-quvvatlash, jamiyatda mehr-saxovat va o‘zaro g‘amxo‘rlik muhitini qaror toptirishga alohida e’tibor qaratilmoqda. Urgut tumanida o‘tkazilgan mazkur xayrli tadbirlar ham ana shu ezgu maqsadlarga xizmat qilib, aholi o‘rtasida hamjihatlik, bag‘rikenglik va insonparvarlik tuyg‘ularini yanada mustahkamladi.
Mehr bor joyda ishonch, saxovat bor joyda baraka, inson qadri ulug‘langan jamiyatda esa tinchlik va farovonlik qaror topadi. Ana shunday ezgu amallar xalqimiz o‘rtasidagi birdamlik rishtalarini mustahkamlab, yurtimizning yanada obod va fayzli bo‘lishiga xizmat qiladi.
Samarqand viloyati vakilligi matbuot xizmati
