Oylar sultoni – Ramazoni sharif, xush kelding!
Bag‘rida Allohning rahmat va mag‘firatini, biz ojiz bandalar jismiga do‘zax olovidan najot lutf-inoyatini joylagan sog‘inchli oy, marhabo! Ey mohi Ramazon! Senda rahmat va hidoyat manbai – Qur’oni karim nozil bo‘lgan. Tunlaring orasiga yashiringan bir kecha ming oydan afzal, qadrli. Xotamul anbiyo – Rasululloh (sollallohu alayhi va sallam)ga kelgan buyuk vahiy – “O‘qi!” amriga yolg‘iz guvoh bo‘lgan Qur’on oyi Marhabo!
Rasululloh (sollallohu alayhi va sallam): “Agar ummatim Ramazon oyida ular uchun qancha fazilatlar borligini bilganlarida edi, yilning hammasi Ramazon bo‘lishini xohlar edilar” degan muborak o‘gitlari hikmatini tuyish ila seni sog‘indik, mohi Ramazon!
“Oylarning eng afzali Ramazon” (Imom Tabaroniy rivoyati) seni sog‘inch ila yil bo‘yi intiq kutdik! Allohning kalomi nozil qilingan muborak oy, bag‘ringda nafsimizning qutqularidan, zanjirband etilgan shaytoni la’in vasvasalaridan xalos bo‘lamiz. Ming oydan xayrli bo‘lgan kechang – Qadrda, ibodat qilib, ulkan savoblar qozonib, kelgusi yil uchun tushiriladigan taqdirimiz uchun duoi xayrlar qilamiz. Marhamati qahridan ustun bo‘lgan Olamlar Rabbisining bandalariga bergan barakotli mohi, shu sabab senga mushtoqmiz.
Yil bo‘yi Seni o‘zgacha sog‘inch, ishtiyoq, umid bilan kutamiz. Tashrifing-la mo‘minlar boshi uzra rahmat, mag‘firat yog‘iladi. Senda jannat eshiklari ochiladi, do‘zax qopqalari berkitiladi.
Ilk dahangda behisob rahmatdan dillarimiz yorishadi. Axir, banda uchun Alloh rahmatidan ham ortiq ne bor?! Zotan, Parvardigor rahmati tushgan makon hamisha obod, tinch-totuv, mehr-muhabbat, sadoqat, omonlik... faqat ezgulik hukmida bo‘ladi. Xatolar kechiriladi, astoydil qilingan tavbalar qabul qilinadi, qalblar poklanadi. Gunohlarimizdan forig‘ etuvchi mag‘firat borki, ezgu niyatlar ila xayrli ishlarga shoshilamiz. Zero, Yaratganning rahmatiga erishgan, gunohlari afv etilgan inson, albatta, buyuk xursandchilikda bo‘ladi. So‘nggida jismni olovdan saqlash inoyati qalbimizga taskinlik baxsh etadi.
Chunki sarvari olam Rasululloh (sollallohu alayhi va sallam): “Ro‘za himoya qiluvchi qalqon va jahannam o‘tidan saqlovchi mustahkam qo‘rg‘ondir” deganlar (Imom Ahmad va Imom Bayhaqiy rivoyati).
Ana shu mujdalar ila qalblarimiz ta’rifga sig‘mas shodu xurramlikka to‘la. Insonlar qalbida bir-birlariga ochiq ko‘ngillilik, mehr-muhabbatning paydo bo‘lishi, ayniqsa, xushfe’llik, tavoze, olijanoblik va saxovat singari fazilatlarning yuksalishi sening tashrifing sharofatidandir.
Savobli ishlarni ado etib, savobga erishmoq istagida chin ixlos ila, qalbdagi imon gavhari bilan senga intilamiz, qadri ulug‘ aziz oy! Senga sog‘inchim boisi, hadisi qudsiyda aytilgan (Abu Hurayra (roziyallohu anhu)dan rivoyat qilinadi): “Odam bolasining har bir amali uning uchundir. Faqat ro‘za men uchundir. Unga o‘zim mukofot beraman!” (Imom Ahmad, Imom Muslim va Imom Nasoiy rivoyati) degan Allohning marhamatidir.
Ajib bir saodatki, ikki dunyo yaxshiliklariga eltuvchi xayrli amallar mujassam qilingan ey mohi Muborak! Tashrifing qutlug‘ bo‘lsin!
Mahmud QAHHOROV,
Kitob tumanidagi 55-maktab o‘qituvchisi
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati
