Ramazon oyining ilk kunida Namangan viloyatidagi Mingbuloq neft konida olib borilayotgan investitsion loyihalar doirasidagi sinash ishlari mobaynida ilk neft qazib olingan.
Boy zaxiraga ega Mingbuloq neft konida yer osti boyliklarini o‘zlashtirish tadbirlari ancha murakkab bo‘lib, bu ishga Xitoy Xalq Respublikasi CNPC milliy neft-gaz korporatsiyasining boy tajribaga ega mutaxassislari, ilg‘or texnologiya vositalari jalb qilingan.
Loyiha ijrosi mas’uliyati cheklangan jamiyat shaklidagi “Mingbuloqneft” o‘zbek-xitoy qo‘shma korxonasi tomonidan amalga oshirilmoqda. Keyingi ikki yil davomida bu yerda M 15-qudug‘ini burg‘ilash va boshqa bir qator loyihaviy ishlar olib borildi.
Ekspertlarning fikricha, Mingbuloq koni bir necha sabablarga ko‘ra oddiy emas, deb sanaladi. Konni ishga tushirishda asosiy muammolar quyidagilardir: uning o‘ta chuqurlikda ekanligi (6000 m va undan ham ortiq); yuqori plast bosimlari (115 MPa'dan ortiq), plast haroratlari (168 darajadan ortiq) va boshqa omillar.
Xitoyning SNPC neft kompaniyasi Xitoyning Torim botig‘ida shunday konlar bilan ishlab ko‘rib orttirgan tajribasini Mingbuloq konida ham qo‘llagan.
Alloh taolo ushbu neft konini barakotli qilsin, xalqimiz farovonligiga xizmat qilishini nasib aylasin.

O‘zbekiston musulmonlari idorasi Matbuot xizmati