Avval xabar berganimizdek, o‘zbekistonlik qorilar  Rossiya Federatsiyasining turli o‘lkalarida bo‘lib, muborak oy davomida tarovih namozi va xatmi Qur’onlarda ishtirok etadilar. Bugun 7 may kuni o‘zbekistonlik yana besh nafar qori Moskva shahriga yetib bordilar. Bugunning o‘zida qorilarimiz Moskva shahrida Rossiya musulmonlari jamiyati raisi, muftiy Albert hazrat Krganov qabulida bo‘ldilar. Muftiy hazrat o‘zbekistonlik diniy ulamolar, qorilar ko‘p yillardan buyon Rossiya musulmonlarining ixlosi, e’tirofiga sazovor bo‘lib kelayotgani, diniy idoralar o‘rtasidagi o‘zaro hamkorlik samarali natijalar berib borayotganligi haqida so‘zlab berdi. O‘z navbatida qorilarimiz ham o‘zlariga bildirilayotgan ishonchni oqlab, Alloh qodir qilganicha bor bilimlarini berib, musulmonlarga islomiy ma’rifatni yetkazishda astoydil harakat qilishlarini  bildirdilar.

Shundan so‘ng qorilarimiz o‘zlari taqsimot qilingan hududlarga yo‘l oldilar. Jumladan:

• Toshkent shahar “Said Vaqqos ota” jome masjidi imom noibi Fazliddin Mamadaliyev, “Abdulloh ibn Huzofa” jome masjidi imom-xatibi Abdullatif Rustamjonov, Toshkent viloyati “Abdujalilbob” jome masjidi imom-xatibi Ilyos Shokirovlar Chuvashiya Respublikasi, Cheboksari shahrida;
• Toshkent shahar “Yahyo qori” jome masjidi imom noibi Abdulbosit Abdullayev Moskva viloyatiga qarashli Zvenigorod shahrida;
• Toshkent shahar “Tinchlik” jome masjidi imom-xatibi Ibrohim Nurmuhammedov Xanti-Mansiysk okrugidagi Surgut shahridagi masjidlarda tarovih namozlarida xatmi Qur’on o‘tkazib beradigan bo‘lishdi.

Xorijda faoliyatlarini davom ettirayotgan qorilarimiz haqida portalimiz orqali xabar berib boramiz.

O‘zbekiston musulmonlari idorasi Masjidlar bo‘limi