2 may kuni Toshkentdagi “Wyndham Tashkent Hotel” mehmonxonasida Markaziy Osiyoda Islomiy moliya va bankchilik 2019 forumining ochilish marosimi bo‘lib o‘tdi. Tadbir davomida O‘zbekistonda islomiy moliya va bankchilik munosabatlarini tashkil qilishga qaratilgan sa’y-harakatlar va shu sohadagi istiqbolli yo‘nalishlar muxokama etildi.
Tadbirning faxriy mehmoni sifatida O‘zbekistonga kelgan Qozog‘iston Respublikasi Investitsiyalar va rivojlanish vazirligi maslahatchisi, Islom moliyasi bo‘yicha mutaxassis Yerlan Alimjanovich Baydauletning «Islom moliyasi asoslari» kitobining o‘zbek tilidagi tahriri keng jamoatchilik hukmiga xavola qilindi.
Ta’kidlab o‘tish joizki, ushbu kitob Islom taraqqiyot bankining (ITB) O‘zbekistondagi vakili Husan Hasanovning umumiy tahriri ostida iqtisodchi Botirxo‘ja Jo‘rayev tarjimasi asosida o‘zbek tilida nashrga tayyorlandi va qo‘shimcha ma’lumotlar va alohida qismlar bilan to‘lg‘azildi.
Mazkur kitob oliy o‘quv yurtlari talabalari, tadqiqotchilar va keng jamoatchilik uchun mo‘ljallangan bo‘lib, iqtisodchi B.Jo‘rayev tomonidan islomiy moliya sohasida o‘zbek tiliga tarjima qilingan ikkinchi asar hisoblanadi. Kitobdan islomiy moliyalashtirishning nazariy asoslari, mexanizmlari, vositalari, shu soha bilan shug‘ullanadigan xalqaro tashkilotlar hamda xorijiy davlatlarda bu sohaning rivojiga oid ma’lumotlarni topishingiz mumkin. Mazkur kitob, shuningdek, H.Hasanov tomonidan tayyorlangan O‘zbekiston Respublikasida islomiy moliyalashtirish bo‘yicha ma’lumotlar bilan boyitilgan.
Quyidagi havola orqali mazkur kitobni yuklab olishingiz mumkin.
O‘zbekiston musulmonlari idorasi Matbuot xizmati
O‘tgan solih zotlar jamoat bilan namoz o‘qiyolmay qolsalar, bir-birlariga ta’ziya izhor qilishar ekan. Shunday zotlardan biri Hotamul Asom aytadi: “Men jamoatga ulgurmay qoldim, shunda menga Abu Is'hoq Buxoriyning bir o‘zi ta’ziya bildirdi. Agarda o‘g‘lim o‘lib qolsa minglab odamlar ta’ziya izhor qilishadi. Buning sababi odamlar nazdida din musibati dunyo musibatlaridan ko‘ra arzimas sanalganidandir”.
Bugungi kunda oramizda qanchalab odamlar jamoat namozlarini o‘tkazib yuboradilar, jiddiy e’tibor qaratmaydilar. Ba’zida ish, g‘am-tashvishlarning ko‘pligini bahona qilamiz, to‘g‘rimi?! Yana ko‘plar tuni bilan uxlamasdan, bomdod namoziga yaqin uxlab qolishlari ham bor gap.
Rasululloh sollallohu alayhi vasallamning “Zimistonda masjidlar sari odim tashlovchilarga qiyomat kunidagi tamomiy nurning xushxabarini beringlar”[1] deganlarini nahot eshitmagansiz?!
Shayton sizning ustingizdan g‘alabaga erishib, namozda xotirjamligingizni ketkazishiga imkon bermang!
Omir ibn Abdulloh o‘lim to‘shagida yotganlarida azon ovozini eshitib: “Meni qo‘limdan tutinglar”, dedilar. Omir ibn Abdullohga “Axir siz betobsiz-ku”, deyishganida: “Allohning chaqirig‘ini eshitib turib, unga rioya qilmaymanmi”, dedilar. Keyin u kishini qo‘lidan ushlab turg‘izishdi. Masjidda imom bilan shom namozining bir rakatini o‘qidilar va jon taslim qildilar.
Yana bir misol: Sufyon ibn Uyayna azon aytilishidan ilgari namozga borishga ishtiyoqmand bo‘lganlar va doim: “Namozga azon aytilmagunicha masjidga kelib turmaydigan yomon qul bo‘lma. Chunki yomon qul chaqirmaguningcha kelmaydi”, der edilar.
Oisha roziyallohu anho onamiz aytadilar: “Rasululloh sollallohu alayhi vasallam bilan suhbatlashib o‘tirardik, u zot ham biz bilan gaplashib o‘tirardilar. Bordi-yu, namoz vaqti kirib qolsa, bir-birimizni tanimaganday bo‘lib olardik”[2].
Shukrki, oramizda masjidda birinchi safga joylashish uchun g‘ayrat qiluvchilar ko‘payib bormoqda. Nabiy alayhissalom: “Agarda odamlar azonda va birinchi safda nimalar borligini bilishsa edi, unga erishish uchun qur’a tashlashdan boshqa chora bo‘lmasa, albatta, qur’a tashlagan bo‘lardilar”, deganlar.
Said ibn Musayyab aytadi: “Men ellik yildan beri biror marta birinchi takbirni o‘tkazib yubormaganman. Ellik yildan buyon namozda birorta kishining boshining orqasiga qaragan emasman”.
Hasson Shamsiy Poshoning
“Jannat bo‘stonidagi oilaviy oqshomlar” nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.
[1] Imom Termiziy va Imom Abu Dovud rivoyati.
[2] Mursal hadis. Iroqiyning “Ihyo”ga yozgan taxrijiga qarang (1, 205).