BAAda xalqaro tinchlik forumi o'tkaziladi
Shu yil noyabr' oyida Vatikan Abu-Dabida diniy etakchilar bilan “Tinchlik uchun uchrashuv” forumini tashkil etishni rejalashtirmoqda. Bu haqda Rim papasi “Vida Nueva” haftaligiga bergan intervyusida ma'lum qildi.
IQNA saytining “Islam today” matbuot xizmatiga tayanib xabar berishicha, “Noyabr oyida BMTning Dubaydagi iqlim sammiti oldidan Abu Dabida diniy etakchilar bilan tinchlik bo'yicha yig'ilish bo'lib o'tadi”, – dedi Rim papasi Fransisk.
Eslatib o'tamiz, 2019 yilning fevral' oyida Fransisk Arabiston yarim oroliga keldi. Bu tarixiy tashrif deb ataldi. Uning doirasida dinlararo muloqotni rivojlantirishga oid hujjat imzolandi.
O'zbekiston musulmonlari idorasi
Matbuot xizmati
Buxoroda Qur’on musobaqasi o‘tkazildi
O‘zbekiston Respublikasi Davlat mustaqilligining 35 yilligi munosabati bilan Buxoro viloyatida faoliyat olib borayotgan imom-xatib va imom-noiblar o‘rtasida “Qur’on tinchlikka buyuradi” shiori ostida Qur’on musobaqasi o‘tkazildi.
Ochilish marosimida Buxoro viloyati bosh imom-xatibi Jobir domla Elov so‘zga chiqib, mazkur ma’rifiy tadbirning ahamiyati haqida so‘zlab, ishtirokchilarga muvaffaqiyat tiladi.
Musobaqani o‘tkazishdan ko‘zlangan maqsad diniy soha xodimlarining Qur’oni karim bo‘yicha bilim va mahoratini yanada oshirish, ular o‘rtasida o‘zaro hamjihatlik muhitini shakllantirishdir.
Bellashuvda viloyatning tuman va shaharlarida faoliyat yuritayotgan 10 nafar imom-xatib va imom-noib ishtirok etib, Qur’oni karimni o‘qish va yoddan bilish borasidagi bilim va mahoratini namoyish etishdi.
Birinchi o‘ringa Peshku tumani “Chiqirchi” jome masjidi imom-noibi Afzal Shavkatov sazovor bo‘ldi. Ikkinchi o‘rin Buxoro shahridagi “Volidi Abdulazizxon” jome masjidi imom-noibi Abduvohid Akramovga, uchinchi o‘rin Jondor tumani “Raboto‘g‘lon” jome masjidi imom-xatibi Shuhrat Sherovga nasib etdi.
G‘oliblarga diplom va qimmatbaho sovg‘alar topshirildi.
O‘zbekiston musulmonlari idorasi
Matbuot xizmati
