Olimlarning “Ko‘z yoshi sirlari va yig‘ining foydalari” haqida olib borgan tadqiqotlari xulosasida aytilishicha, yig‘i insondagi ba’zi ruhiy iztiroblarga ijobiy ta’sir qilib, tushkunlik va depressiyaga qarshi kurashda samarali ta’sir ko‘rsatar ekan. Shuningdek, ko‘z yoshi ko‘zni chang va bakteriyalardan tozalaydi, yuqori va pastki qovoqlarning erkin harakatlanishiga yordam beradi, ko‘zni muntazam namlab, qurib qolishining oldini oladi, ko‘z qorachig‘ining shaffofligini ta’minlaydi, ko‘rish ravshanligi va quvvatini oshiradi. Bundan tashqari tanadagi og‘riqni kamaytirishda ham ko‘z yoshining o‘rni bor.

Alloh taolo bizga O‘zidan qo‘rqib yig‘lash ne’matini ato etgan. Agar inson Alloh taolodan qo‘rqib yig‘lasa, xotirjamligi va ixlosi ziyoda bo‘lar ekan. Alloh taolo Qur’oni Karimda shunday degan: 

وَيَخِرُّونَ لِلأَذْقَانِ يَبْكُونَ وَيَزِيدُهُمْ خُشُوعاً

“Va yuzlari ila yiqilib yig‘larlar va u xokisorliklarni ziyoda qilur” (Isro surasi, 109-oyat).

Payg‘ambar sollallohu alayhi vasallam aytdilar: “Allohdan qo‘rqib yig‘lagan kishi, to sut yelinga qaytgunicha, do‘zaxga kirmaydi”. Termiziy rivoyati.

Ma’lumki, tuya, sigir, qo‘y kabi hayvonlardan sog‘ilgan sut hech qachon yelinga qaytmaydi. Demak, Alloh taolodan qo‘rqib yig‘lagan kishi do‘zaxga kirmaydi.

Rasululloh sollallohu alayhi vasallam aytdilar: “Ikki ko‘z borki, ularga do‘zax o‘ti tegmaydi. Bular: Allohdan qo‘rqib yig‘lagan ko‘z va Alloh yo‘lida qo‘riqchilik qilib, bedor holda tong ottirgan ko‘z”. Termiziy rivoyati.

“Ko‘zga do‘zax o‘ti tegmaydi” degani o‘sha ko‘zning sohibiga do‘zax olovi tegmaydi deganidir.

Abdulloh ibn Umar roziyallohu anhumo shunday dedilar: “Allohdan qo‘rqib ko‘z yoshi to‘kishim men uchun ming dinorni sadaqa qilishimdan yaxshiroqdir”.

Buyuk sahobiyning bu hikmatlari ham Alloh taolodan qo‘rqib yig‘lashning savobi, fazilati qanchalik ulug‘ligini ko‘rsatib turibdi. Alloh taolodan qo‘rqib ko‘z yoshi to‘kish ming dona tilla tangani sadaqa qilishdan yaxshiroq ekan.

Alloh taolo bizni O‘zidan qo‘rqib yig‘laydigan va buning natijasida iymon nuri, xushu’si ziyoda bo‘ladigan bandalaridan qilsin, omin!

Internet ma’lumotlari asosida

Nozimjon Iminjonov tayyorladi