Muftiy Muhammad Taqiy Usmoniy hafizahulloh Samarqandga tashrif buyurdilar
Bugun 2019 yilning 16 aprel kuni Islom dunyosining mashhur olimi Shayxul islom, muftiy Muhammad Taqiy Usmoniy hafizahulloh va mehmonlar Buxoro ziyoratini yakunlab, Samarqand sari yo‘l olishdi.
Muhammad Taqiy Usmoniy hafizahulloh Samarqand shahrida hurmat va ehtirom ila kutib olindi.
Mehmonlar dastlabki ziyoratni hadis ilmining sultoni Imom Buxoriy yodgorlik majmuasidan boshladilar. Buyuk vatandoshimizning marqadlarida Qur’on tilovat qilindi.
So‘ngra, mehmonlar hadis ilmining sultoni Imom Buxoriy mangu qo‘nim topgan muqaddas majmua yonida tashkil etilgan hadis ilmi maktabiga tashrif buyurishdi. Tashrif chog‘ida ziyoratchilarga maktab faoliyati va olib borilayotgan islohotlarning muhim ekanligi, Qur’oni karim va hadislarning asl mohiyati, hadis ilmining ilmiy-nazariy asoslari haqida batafsil ma’lumotlar berildi. Yig‘ilgan ahli ilmlarga hadisdan ijozalar berildi hamda o‘zbekona urf-odatlarimizga muvofiq mehmonga do‘ppi va to‘n kiydirildi.
Tashrif chog‘ida Ulug‘bek rasadxonasi ham ziyorat qilindi va mehmonlar uning boy tarixi bilan tanishtirildi. Muftiy Muhammad Taqiy Usmoniy hafizahullohning yurtimizdagi safarlarining davomi imom Moturidiy ziyoratgohi bilan davom etdi. Ushbu ziyoratgoh 2000 yilda Chokardiza qabristoni hududida kalom ilmining moturidiya oqimi asoschisi Muhammad ibn Mahmud al-Hanafiy al-Moturidiyga bag‘ishlab bunyod etilgan.
Shundan keyin Xo‘ja Ahror Valiy majmuasi ziyorat qilindi va peshin namozi ado etildi. Ta’kidlash joizki, mashhur olim Shayxul islom, muftiy Muhammad Taqiy Usmoniy hafizahulloh yomg‘irli ob-havoga qaramay ziyorat safarlaridan mamnun ekanliklarini alohida ta’kidlab o‘tdilar.
Islom.uz portali tahririyati
Manba: https://islom.uz
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
