Ramazon oyining birinchi kunini aniqlash bo‘yicha muloqot
Kuni kecha, 11 aprel kuni Qozog‘istonning Nur-Sulton shahrida O‘zbekiston, Qozog‘iston hamda Qirg‘iziston ulamolari ishtirokida Ramazon oyi va hayitining birinchi kunini aniqlash bo‘yicha davra suhbati bo‘lib o‘tdi.
Unda O‘zbekiston musulmonlari idorasi Fatvo bo‘limi mudiri Xomidjon Ishmatbekov, Qozog‘iston musulmonlari idorasi Shariat ishlari bo‘limi mudiri Chuxanov Sansibay, mudir o‘rinbosari Amanqulov Hasan, Qirg‘iziston musulmonlari idorasi apparati boshlig‘i Kadirberdiyev Abibulla ishtirok etdi.
Muloqotda qo‘shni mamlakatlar diniy idoralari bilan hamkorlik aloqalari o‘zining ijobiy samaralarini berib kelayotganiga alohida e’tibor qaratildi. Mintaqadagi mo‘min-musulmonlar birdamligini ta’minlash, shar’iy ehtiyojlarini qondirish va ulamolar hamfikrliligini yo‘lga qo‘yishda bo‘yicha yaxshi natijalarga erishilmoqda. Masalan, o‘tgan Ramazon oyi va hayitining birinchi kunini aniqlashda O‘zbekiston, Qozog‘iston va Qirg‘iziston musulmonlari idoralari hamkorlikda ishlashlari o‘zining juda yaxshi natijalarini berdi.
Ulamolar Islom dini manbalari va astronomik ma’lumotlarga tayangan holda 2019 yilda Ramazon oyi va hayitining birinchi kuni qaysi kunga to‘g‘ri kelishi mumkinligi haqidagi fikr-mulohazalarni ma’lum qildilar. Shuningdek, Sha’bon oyini kuzatib borish va Ramazon oyi hilolini aniqlash bo‘yicha kelgusida yana bir bor kengashib olishga kelishildi.
O‘zbekiston musulmonlari idorasi Matbuot xizmati
Bayram shukuhi Jizzaxda ham davom etmoqda
O‘zbekiston Respublikasi davlat mustaqilligining 35 yilligi arafasida “Vaqf” xayriya jamoat fondining Jizzax viloyati filiali tomonidan xayriya tadbiri tashkil etildi.
Viloyatning turli hududlaridan bo‘lgan boquvchisini yo‘qotgan 35 nafar bolaning xatna to‘yi qilib berildi.
Tadbirda bolajonlarga velosiped, kostyum-shim va ko‘ylaklar, shirinliklar qutisi sovg‘a qilinib, bayram dasturxoni yozildi.
Bolajonlarga qo‘shilib, ularning yaqinlari ham quvonchdan tashakkur aytib, tashkilotchilar, Yurtboshimiz haqlariga duolar qilishdi.
Shuningdek, tadbir doirasida ijtimoiy himoyaga muhtoj, boquvchisini yo‘qotgan hamda kam ta’minlangan oilalar farzandlariga e’tibor va g‘amxo‘rlik ko‘rsatilib, ularga ham hadyalar ulashildi.
Bunday ezgu tashabbuslar jamiyatda o‘zaro mehr-oqibat, saxovat va hamjihatlik muhitini mustahkamlash, yosh avlod qalbida Vatanga muhabbat va insonparvarlik tuyg‘ularini yuksaltirishga xizmat qiladi.
O‘zbekiston musulmonlari idorasi
Matbuot xizmati
