“Og‘riqning davosi nima?” deb so‘rashdi. “Davosi – sabr” dedim.
“Muvaffaqiyatsizlikning davosi nima?” deb so‘rashdi. “Davosi – o‘sha ishni takroran bajarib ko‘rish” dedim.
“Hasadning davosi nima?” deb so‘rashdi. “Davosi – o‘zini bilmaganga olish” dedim.
“Faqirlikning davosi nima?” deb so‘rashdi. “Davosi – qanoat” dedim.
“Zaiflikning davosi nima?” deb so‘rashdi. “Davosi – iymon” dedim.
“Hunuklikning davosi nima?” deb so‘rashdi. “Davosi – go‘zal axloq” dedim.
“Johillikning davosi nima?” deb so‘rashdi. “Davosi – ilm o‘rganish” dedim.
“Ahmoqlikning davosi nima?” deb so‘rashdi. “Davosi – sukut saqlash” dedim.
“Dushmanlikning davosi nima?” deb so‘rashdi. “Davosi – ehson, yaxshilik qilish” dedim.
“Yoqtirmaslikning davosi nima?” deb so‘rashdi. “Davosi – muhabbat” dedim.
“Og‘riq va iztiroblarning davosi nima?” deb so‘rashdi. “Davosi – tabassum” dedim.
“Musibatning davosi nima?” deb so‘rashdi. “Davosi – istig‘for aytish” dedim.
“Nafsning gunoh bo‘lgan istaklarining davosi nima?” deb so‘rashdi. “Davosi – uni o‘sha istaklardan mahrum etish” dedim.
“Charchoqning davosi nima?” deb so‘rashdi. “Davosi – uyqu” dedim.
“Yuqoridagi savollardagi holatlarning davosi nima?” deb so‘rashdi. “Davosi – “Ey Robbim!” deb duoga qo‘l ochmoqdir” dedim.
Internet ma’lumotlaridan Nozimjon Iminjonov tarjimasi
14 yanvar – Vatan himoyachilari kuni bayrami yurtimizda milliy g‘urur va fidoyilik ramzi sifatida alohida o‘rin tutadi. Bu kun Vatan himoyasi yo‘lida halollik va jasurlik ko‘rsatgan barcha fuqarolarni qadrlash, ularning hissasini e’tirof etish kunidir.
Vatan himoyachilari nafaqat harbiylar, balki mamlakat tinchligi va xavfsizligini ta’minlashga hissa qo‘shayotgan barcha insonlardir. Ular sog‘lom, barqaror jamiyat qurish yo‘lida faoliyat olib borayotgan, ertangi kunning tinchligi uchun mehnat qilayotgan va boshqalarga namuna bo‘layotgan kishilardir.
Har bir kishi vatanparvarlikni o‘z oilasidan, mahallasidan boshlashi lozim. Otinoyilar, ustozlar va ziyolilar yosh avlodga Vatanga bo‘lgan muhabbatni, uni himoya qilish mas’uliyatini yoshlikdan o‘rgatmog‘i kerak. Chunki kelajak avlodning ma’naviyati va irodasi Vatan mustaqilligini yanada mustahkamlaydi.
Bugungi kunda yoshlar harbiy bilimlar bilan birga axloqiy va ma’naviy tarbiyaga ham katta ahamiyat berishi kerak. Shu yo‘l bilan ular Vatanga fidoyilik bilan xizmat qilishga tayyor, shijoatli va barkamol shaxslar bo‘lib yetishadi.
14 yanvar kuni nafaqat bayram, balki Vatanga sadoqat va mas’uliyatni eslatuvchi muhim sana bo‘lib, har birimizga milliy iftixor hissini uyg‘otadi. Tinchlikning qadrini bilish, uni asrash va kelajak avlodga sog‘lom yurt qoldirish barchamiz uchun muqaddas burchdir.
Rizvon Bahramova,
Buxoro viloyati bosh imom-xatibining
xotin-qizlar masalalari bo‘yicha yordamchisi