Xalqaro anjumanda muftiy hazrat ma’ruza qildi
Bugun, 11 aprel kuni O‘zbekiston musulmonlari idorasi raisi, muftiy Usmonxon Alimov hazratlari Qozog‘istonning Nur-Sulton shahrida bo‘lib o‘tayotgan “Ma’naviy ipak yo‘li: Islom va yoshlar: zamonaviy tahdidlar” nomli anjumanda ma’ruza qildilar.
Muftiy hazratlari o‘z ma’ruzalarida musulmon ummatining kelajagi yoshlar tarbiyasiga bog‘liq ekani, ta’lim-tarbiyaga katta ahamiyat qaratgan millatning ertasi faravon bo‘lishi, lekin hozir yoshlar orasida jinoyatchilik keng tarqalayotgani, axloqiy tubanlashish ortib borayotgani va yoshlarning odob-axloq me’yorlaridan uzoqlashishi oqibatida juda xatarli illatlar kelib chiqayotganiga alohida urg‘u qaratdilar.
Ushbu muammolarning tub negizida esa yoshlarning diniy-axloqiy tarbiyadan uzoqligi yotishi, shuning uchun ham, din peshvolari yoshlarni axloqiy qadriyatlar va mustahkam e’tiqod bilan oziqlantirish orqali ularni mana shunday tahdidlar domidan saqlab qolish zarurligini muftiy hazratlari ta’kidladilar.
Shuningdek, muftiy hazratlari Islom hamjamiyati oldida turgan eng katta va dolzarb vazifalardan biri yosh avlodga har tomonlama diniy va dunyoviy bilimlar berish, shu bilan bir qatorda sof Islom axloqi bilan tarbiyalash muhimligini bayon qildilar.
Nur-Sulton shahridagi anjuman davom etmoqda.
O‘zbekiston musulmonlari idorasi Matbuot xizmati
Xalqaro forum oldidan matbuot anjumani o‘tkazildi
Bugun O‘zbekistondagi Islom sivilizatsiyasi markazida yurtimizda 7-11 iyul kunlari o‘tkaziladigan “Islom sivilizatsiyasi: tinchlik, bag‘rikenglik va ilm-ma’rifat yo‘li” mavzusidagi I Xalqaro Islom sivilizatsiyasi forumi yuzasidan matbuot anjumani bo‘lib o‘tdi.
Anjumanda Islom sivilizatsiyasi markazi direktori Firdavs Abduxoliqov, Din ishlari bo‘yicha qo‘mita raisining birinchi o‘rinbosari Davronbek Maqsudov, Imom Moturidiy xalqaro ilmiy-tadqiqot markazi direktori Komiljon Shermuhamedov, ISЕSKO rahbari Salim Muhammad hamda xalqaro al-Furqon jamg‘armasi raisi Sali Shahsuvariy so‘zga chiqdi.
Matbuot anjumanida mazkur nufuzli tadbirning maqsad va vazifalari, uning xalqaro ahamiyati hamda forum doirasida rejalashtirilgan ilmiy-ma’rifiy tadbirlar haqida ma’lumot berildi.
Ta’kidlanganidek, Toshkent, Samarqand va Termiz shaharlarida o‘tkazilayotgan forumda dunyoning turli mamlakatlaridan taniqli ulamolar, muftiylar, islomshunos olimlar va xalqaro tashkilotlar vakillari ishtirok etadi.
Ushbu forum islom dinining tinchlik, bag‘rikenglik, ilm-ma’rifat va insonparvarlikka asoslangan asl mohiyatini xalqaro jamoatchilikka yetkazishda muhim ahamiyat kasb etishi ta’kidlandi. Shu bilan birga, mazkur anjuman O‘zbekistonning islom sivilizatsiyasi rivojidagi tarixiy o‘rni, buyuk allomalar merosi va ma’rifiy an’analarini dunyo miqyosida yanada keng namoyon etishga xizmat qilishi alohida qayd etildi.
Ma’lumot o‘rnida, shu yil 7–8 iyul kunlari Toshkentdagi Islom sivilizatsiyasi markazida konferensiyalar bo‘lib o‘tadi. 9–10 iyul kunlari esa Samarqand va Termiz shaharlarida Imom Buxoriy, Imom Moturidiy va Imom Termiziyning ilmiy-madaniy merosiga bag‘ishlangan xalqaro konferensiyalar tashkil etiladi.
Forum doirasidagi bunday uchrashuv va muhokamalar ilm-fan, dinlararo muloqot, bag‘rikenglik va ma’rifat tamoyillarini mustahkamlashda muhim amaliy maydon vazifasini bajaradi.
O‘zbekiston musulmonlari idorasi
Matbuot xizmati
- «
- »