Hadis ilmi maktabiga nodir kitoblar sovg‘a qilindi
O‘tgan kuni, kitob mutolaasi orqali yoshlar ta’lim-tarbiyasini yaxshilash va ilm-ma’rifatini oshirishga oid tashabbusga mos ravishda O‘zbekiston musulmonlari idorasi bo‘lim mudirlari Muhammad Ayubxon Homidov va Kamoliddin Mahkamov Samarqand viloyatidagi oliy diniy ta’lim muassasasi hisoblangan – Hadis ilmi maktabiga o‘zlarining shaxsiy kutubxonalaridan eng nodir va noyob asarlarni sovg‘a qildilar.
Taqdim etilgan kitoblar orasidagi Abu Lays Samarqandiyning “Tafsiru Samarqandiy”, Imom Molikning “Muvatto”, Badruddin Ayniyning “Al-Banaya Sharhul Hidoya”, Mulla Ali Qoriyning “Fathu babil Inoya” va Ibn Manzur Misriyning “Lisanul Arab” nomli asarlar talabalar uchun muhim qo‘llanma bo‘ladi, insho Alloh.
Muhammad Ayubxon Homidov ilmu ma’rifatli inson bo‘lish uchun, avvalo, puxta bilim olish zarurligi, ko‘p kitob mutolaa qilish muhimligini aytib, kitob va uning mutolaasining foydalari haqida so‘zladi.
Zabardast ulamolar va mutafakkirlar kitobga shu qadar mehr qo‘ygan edilarki, hatto tunlari sham yorug‘ida bo‘lsa ham kitob mutolaa qilganlar. Buyuk muhaddis Imom al-Buxoriy hazratlari 12 yoshlarida Qur’oni karimni yod olganlar, umrlari davomida olti mingdan ziyod hadisni hifz qilganlar. Mutafakkir Alisher Navoiy hazratlari esa 7 yoshida Farididdin Attorning «Mantiqut-tayr» asarini yod bilgan.
So‘zimizni Abdurahmon Jomiyning quyidagi to‘rtligi bilan yakunlaymiz.
Kitobdan yaxshiroq do‘st yo‘q jahonda
G‘amxo‘ring bo‘lgay u g‘amgin zamonda.
U bilan qol tanho hech bermas ozor,
Joningga yuz rohat beradi takror.
O‘MI Matbuot xizmati
Har bir xonadonga bayram shukuhi kirib bormoqda
O‘zbekiston Respublikasi mustaqilligining 35 yilligi munosabati bilan vohamiz aholining ijtimoiy ko‘makka muhtoj qatlamlarini qo‘llab-quvvatlash, ularning ko‘ngliga quvonch ulashishga qaratilgan xayrli ishlar davom etmoqda.
Bugun, O‘MI Qashqadaryo viloyati vakili, viloyat bosh imom-xatibi Rahmatillo domla Usmonov boshchiliklarida homiylar jalb etilgan holda mahalla hududidagi xonadonlarga tashrif buyurib, xonadon ahillari bilan samimiy suhbatlar o‘tkazildi. Ularni qo‘llab-quvvatlash maqsadida sovg‘a-salomlar va xayr-ehson qutilari tarqatildi.
Bunday xayrli tashabbuslar xalqimizga xos mehr-oqibat, saxovat va insonparvarlik fazilatlarining amaliy ifodasi bo‘lib, ehtiyojmand oilalarga ma’naviy dalda va ko‘mak berishda muhim ahamiyat kasb etmoqda.
Yurtimizda tinchlik-osoyishtalik, xonadonlarimizda fayzu baraka bardavom bo‘lsin!
O‘MI Qashqadaryo viloyati vakilligi
Matbuot xizmati
