Muftiy hazrat xorijlik din va davlat arboblari bilan uchrashdi
Shu yil 22-23 fevral kunlari Buxoro shahrida o‘tkazilgan birinchi xalqaro ziyorat turizmi doirasida O‘zbekiston musulmonlari idorasi raisi, muftiy Usmonxon Alimov hazratlari xorijiy davlatlardan tashrif buyurgan davlat va din arboblari bilan muloqot o‘tkazdilar.
Muftiy hazratlari dastlab Turkiya diyonat ishlari raisi o‘rinbosari professor, doktor Usmon Tiraschi bilan uchrashib, O‘zbekiston va Turkiya davlatlari o‘rtasidagi hamkorlikni yanada rivojlantirish, “Vaqf” xayriya jamoat fondi, ziyorat turizmini rivojlantirish masalalari muhokama qilindi. Professor, doktor Usmon Tiraschi Turkiya davlatining O‘zbekistonga bo‘lgan e’tibori yuqori ekani haqida gapirib, O‘zbekistonning tarixiy obidalari va tariqat namoyondalarining maqbaralari aks etgan “Oltin silsila” taqvimi nashr etilgani to‘g‘risida so‘zlab berdi.
Shuningdek, muftiy hazratlari Rossiya muftiylar kengashi va diniy idorasi raisi o‘rinbosari Rushan Abbasov, Tatariston musulmonlari diniy boshqarmasi raisi o‘rinbosari Rustam Valiulin, Misr Arab Respublikasi Parlamenti a’zosi, Misr so‘fiy tariqatlari kengashi raisi Abdulhodiy al-Qasabiy, Dog‘iston Respublikasi musulmonlari idorasi xalqaro aloqalar bo‘limi boshlig‘i Shixabuddin Guseynov va Indoneziyaning “Istiqlol”, “Doral-Qur’on” muzeylari direktori Muxlis Muhammad Hanafiy bilan uchrashuvlar o‘tkazdilar.
Muloqotda O‘zbekistonning sayyohlik imkoniyatlarini dunyoga keng targ‘ib etish, O‘zbekistonni islom dunyosida ziyorat-turizmi bo‘yicha yirik markazlardan biriga aylantirish va jahonning turli mintaqalaridan, xususan, musulmon dunyosidan diyorimizga sayyohlarni jalb etish masalalari atroflicha muhokama qilindi hamda hamkorlik qilish bo‘yicha kelishuvlarga erishildi.
O‘MI Matbuot xizmati
Rasmlar muallifi Shahzod Shomansur
“Orta Lectura”: O‘zbekiston xavfsiz sayyohlik yo‘nalishi sifatida o‘z mavqeini mustahkamlamoqda
Ispaniyaning “Orta Lectura” nashrida O‘zbekistonda turizm sohasida amalga oshirilayotgan islohotlarga bag‘ishlangan maqola e’lon qilindi, deb xabar bermoqda “Dunyo” AA.
Maqolada qayd etilishicha, so‘nggi yillarda O‘zbekiston turli nufuzli xalqaro reytinglarda hamda xorijiy davlatlarning sayyohlar uchun tavsiyalarida yuqori xavfsizlik darajasiga ega mamlakatlardan biri sifatida e’tirof etilmoqda.
World Justice Project (WJP) tomonidan e’lon qilingan “Rule of Law Index 2025” natijalariga ko‘ra, O‘zbekiston “Tartib va xavfsizlik” ko‘rsatkichi bo‘yicha 143 ta mamlakat orasida 17-o‘rinni, Sharqiy Yevropa va Markaziy Osiyodagi 15 ta mamlakat orasida esa 1-o‘rinni egalladi.
WJP indeksi 215 mingdan ortiq fuqarolar hamda 4 ming 100 nafardan ziyod huquqshunos va ekspertlar o‘rtasida o‘tkazilgan so‘rovnomalarga asoslangani bilan ahamiyatlidir.
“Gallup” kompaniyasining “2025 Global Safety Report” ma’ruzasida ta’kidlanishicha, O‘zbekiston aholisining 86 foizi kechasi yolg‘iz yurganda o‘zini to‘liq xavfsiz his qiladi. Bu ko‘rsatkich dunyo bo‘yicha o‘rtacha 73 foizlik darajadan sezilarli darajada yuqoridir. Shu bilan birga, “Law and Order Index”ning kengroq ko‘rsatkichi bo‘yicha mamlakatimiz 100 dan 91 ball to‘pladi.
Institute for Economics & Peace tomonidan tuziladigan “Global Peace Index 2026” natijalariga ko‘ra, O‘zbekiston o‘z pozitsiyasini 30 pog‘onaga yaxshilab, 163 ta mamlakat orasida 1,726 ko‘rsatkich bilan 37-o‘ringa ko‘tarildi. 2026 yilgi rasmiy hisobotda mamlakatimiz tinchlik ko‘rsatkichlari eng yuqori sur’atda yaxshilangan davlatlar qatoriga kiritildi.
AQSH Davlat departamenti “Travel Advisories” tizimida O‘zbekistonga “Level 1 – Exercise Normal Precautions” darajasini, ya’ni “Odatiy ehtiyot choralariga rioya qilish” tavsiyasini bergan. 2026 yil yanvarda yangilangan tavsiyanomada xavf darajasi oshirilmadi. Bu AQSH Davlat departamenti tomonidan xalqaro sayohatlar uchun belgilanadigan eng past xavf darajasi hisoblanadi.
O‘zbekiston musulmonlari idorasi Matbuot xizmati
- «
- »