Moddiy jihatdan qiynalgan odam o‘g‘li bilan tobut ortidan borardi. Shu payt bola janoza ortida yig‘lab qolgan ayolni ko‘rib qoldi. Ayol “Hozir azizimni chirog‘i yo‘q, to‘shagi yo‘q, noni yo‘q joyga olib borishadi” deb yig‘lardi. Bu gapni eshitgan bolakay darhol otasiga yuzlanib, “Otajon, bu tobutdagi odamni bizning uyimizga olib borishadimi?” deb so‘radi.

Ha, azizlar, bu dunyo sinov maydonidir. Boylik va faqirlik, shohlik va gadolik, sog‘lik va bemorlik kabi holatlar imtihondir.

Kimdir boylik bilan imtihon qilinadi. Inson bu boylikka shukr qilishi, faqirlarga saxovat ko‘rsatishi, boyligini yaxshi ishlarga yo‘naltirishi, oxiratiga zaxira bo‘ladigan joylarga sarf etishi, boylikka aldanib qolmasligi, manmanlikka berilmasligi bilan bu sinovdan o‘tadi.

 Kimdir faqirlik bilan imtihon qilinadi. Inson bu yetishmovchilikka sabr qilishi, Alloh taologa ko‘p duo qilishi, boy bo‘laman deb harom ishlarga qo‘l urmasligi, qanoat va bardoshi bilan bu sinovdan o‘tadi.

Tanasi sog‘ inson sog‘ligining qadriga yetib, uni asrashi, shukrini ado qilishi, bemorlardan ibrat olishi va salomatligida ko‘p ibodat qilib olishi bilan sinovdan o‘tadi.

Bemor odam sog‘lik katta ne’matligini anglashi, bemorligi uning gunohlariga kafforot bo‘lishini tushunib, tanasidagi og‘riqlarga sabr qilishi va Alloh taolodan ofiyat so‘rashi bilan sinovdan o‘tadi.

Boshqa imtihonlar haqida ham shu kabi gaplarni aytish mumkin.

Azizlar, har birlarimiz o‘zimiz turgan holatning sinovligini anglab, undan yaxshi o‘tishga, boy bo‘lsak, shukr qilib, faqirlarning ko‘nglini olishga, faqir bo‘lsak, sabr qilib, Alloh taolodan halol rizq so‘rashga va qanoatli bo‘lishga harakat qilaylik!

Nozimjon Iminjonov tayyorladi