Kuni kecha O‘zbekiston musulmonlari idorasi raisi, muftiy Usmonxon Alimov hazratlari Xorazm viloyati safari mobaynida Urganch shahridagi “Imom Faxriddin ar-Roziy” o‘rta maxsus islom bilim yurtida imom-xatiblar, ustoz-murabbiylar va talaba-yoshlar bilan uchrashuv o‘tkazdilar.
Muloqotda muftiy hazratlari muhtaram Prezidentimiz tomonlaridan diniy-ma’rifiy sohani takomillashtirish, mo‘min-musulmonlarning dardu tashvishlarini yengillatish, diniy savodxonligini oshirish, imon-e’tiqodini mustahkamlash va Islom dinining ezgu ta’limotlarini keng targ‘ib etish yo‘lidagi tarixiy ishlarni teran anglab, buning uchun ertayu kech, tunu kun Haq taologa shukrona keltirish, bunday kunlarning qadriga yetish zarurligini jonli misollar bilan izohlab berdilar.
Shuningdek, muftiy hazratlari hamjihatlikda hikmat ko‘p ekanini bildirib, diyorimizdagi barcha mo‘min-musulmonlar jips bo‘lib yashashlari Yaratgan Parvardigor ne’matlariga munosib shukronalik bo‘lishini aytib o‘tdilar.
Uchrashuvda Xorazm viloyati hokimi o‘rinbosari Mahmudjon Umrzoqov, O‘zbekiston musulmonlari idorasi Xorazm viloyati vakili Xayrullo Abdullayev va ishchi guruh a’zolari ishtirok etdi.

O‘zbekiston musulmonlari idorasi Matbuot xizmati