Kuni kecha O‘zbekiston musulmonlari idorasi raisi, muftiy Usmonxon Alimov hazratlari Xorazm viloyati safari mobaynida Xiva tumanida joylashgan nogironlik uyidagi jismoniy imkoniyati cheklangan shaxslar hayoti bilan yaqindan tanishdilar, shirin so‘zlari bilan ularning o‘ksik qalblariga xursandchilik kiritdilar.
Muhtaram Prezidentimizning 2017 yil 1 avgustdagi “Nogironligi bo‘lgan shaxslarni davlat tomonidan qo‘llab-quvvatlash tizimini tubdan takomillashtirish chora-tadbirlari to‘g‘risida”gi Farmonlarining ijrosini ta’minlash borasida bir qator ishlar qilinmoqda.
Islom dinida insonlarga mehr-muruvvat ko‘rsatishga, muhtojlarga yordam qo‘lini cho‘zishga va jismoniy imkoniyati cheklangan shaxslarga madad berishga doimo targ‘ib etiladi.
Muftiy hazratlari mana shunday insonlar bilan dildan suhbat qilib, o‘zlarining iliq so‘zlari, hikmatli gaplari bilan ularning dillarini ravshan etdilar. Shuningdek, “Vaqf” xayriya jamoat fondi tomonidan ajratilgan nogironlik aravachalari va yotoq choyshablari hadya etildi.
Ushbu tadbirning eng muhim jihati shundaki, ular orqali o‘nlab ko‘ngli yarimta, qalbi o‘ksik kishilarimizga shodlik ulashildi. Rasululloh sollallohu alayhi vasallam bir hadislarida: «Alloh taologa farzlardan keyingi eng sevimli amal musulmonning qalbiga xursandlik kirgizishdir», deganlar.
Hazrat Alisher Navoiy aytadilar:
Kimki bir ko‘ngli buzuqning xotirin shod aylagay,
Oncha borkim, Ka’ba vayron o‘lsa, obod aylagay.
Ha, insho Alloh, bu tadbirlar orqali qanchadan‑qancha vayron bo‘lgan ko‘ngillar obod bo‘ldi, desak aslo mubolag‘a bo‘lmaydi.
Jismoniy imkoniyati cheklangan bunday insonlarning siniq ko‘ngillarini ko‘tarib, dillariga mamnunlik ulashish har bir vijdonli inson uchun huzurbaxsh amallardan hisoblanadi.

O‘zbekiston musulmonlari idorasi Matbuot xizmati