O‘tgan kuni Jizzax shahri “Xo‘ja Nuriddin” jome masjidida eshitish va gapirish qobiliyati cheklangan kishilar bilan diniy-ma’rifiy suhbat bo‘lib o‘tdi. Tadbirda imom-xatiblar, otinoyilar va imkoniyati cheklangan kishilarning 120 nafari ishtirok etdi.
O‘zbekiston musulmonlari idorasining Jizzax viloyati vakili Mehmon Jabborov va Diniy idora mas’ul xodimi Munira Abubakirova eshitish va gapirish qobiliyati cheklanganlar borasida yurtimizda olib borilayotgan keng kshlamli islohotlar va xayriya tadbirlari haqida so‘zlab berdilar.
Ma’lum bo‘lishicha, Jizzax shahrida eshitish va ko‘rish qobiliyati cheklangan shaxslar orasida missionerlar ta’siriga tushib qolish, o‘z dinlaridan voz kechish holatlari kuzatilgan. Shuningdek, yoshlar orasida missionerlar tomonidan turli adabiyot va risolalar tarqatish holatlariga guvoh bo‘lingan.
Dunyo miqyosida g‘oyaviy tahdid sifatida namoyon bo‘layotgan missionerlik faoliyat xatti-harakatlarini o‘z o‘rnida anglash, doimo ogoh bo‘lish va mazkur harakatni o‘z vaqtida bartaraf etish bugungi kunning dolzarb vazifasi ekanini anglash lozim.
Shu sababli, ushbu hududdagi diniy muhitni sog‘lomlashtirish maqsadida, imkoniyati cheklangan shaxslar uchun diniy-ma’rifiy suhbatlar va surdo tarjimalari olib borildi. So‘zga chiqqan notiqlar asosiy maqsad imkoniyati cheklangan kishilarning dinimizni o‘rganishga bo‘lgan ehtiyojlarini ta’minlash, bu boradagi ishtiyoqlarini qo‘llab-quvvatlash, Islom dinining insonparvar g‘oyalarini targ‘ib qilish va shu orqali yot g‘oyalarga barham berish ekanini ta’kidladilar. Shunday tadbirlar orqali nogironligi bo‘lgan shaxslarning ijtimoiy faolligini oshirish, ularni tushkunlikdan asrash va jamiyatda fuqarolar tengligini ta’minlash ham ko‘zda tutilgani alohida qayd etildi.
Yakunda eshitish va ko‘rish qobiliyati cheklangan shaxslar o‘qilgan ma’ruzalardan Islom dini haqida zarur ma’lumotlar olganlari va missionerlarning kirdikorlarini yaqqol tushunib yetganlarini ma’lum qilishdi. Bunday tadbirlar davomiy bo‘lishini istashdi.
Tadbir so‘ngida “Vaqf” xayriya jamoat fondi tomonidan mehr-muruvvat hadyalari tarqatildi. Jizzax shahridagi ko‘r, soqov, gung, jismonan nogironligi bo‘lgan kishilarning xonadonlariga borib sovg‘alar ulashildi.
Ushbu tadbirlarning muhim jihati shundaki, yuzlab ko‘ngli yarimta, qalbi o‘ksik kishilarimizga shodlik ulashildi, xonadonlariga xursandchilik kirib bordi. Rasululloh sollallohu alayhi vasallam bir hadislarida: «Alloh taologa farzlardan keyingi eng sevimli amal musulmonning qalbiga xursandlik kirgizishdir», deganlar.
Eshitish va gapirish qobiliyati cheklangan bunday insonlarning siniq ko‘ngillarini ko‘tarib, dillariga xursandchilik ulashish har bir vijdonli inson uchun huzurbaxsh amallardan ekaniga shubha yo‘q.

Munira ABUBAKIROVA,
O‘MI mutaxassisi