Bugungi otinoyi qanday bo‘lishi kerak?
Ma’naviyati yuksak, ma’rifatli inson har doim jamiyatning, davlatning bebaho boyligi bo‘lib kelgan. Bunday insonlar yurt ravnaqi, jamiyat tinchligi, oilalar totuvligiga o‘zlarining tajribalari bilan katta hissa qo‘shadilar.
Xabaringiz bor, muhtaram Prezidentimiz Shavkat Mirziyoyev raisligida 2023 yil 22 dekabr kuni Respublika Ma’naviyat va ma’rifat kengashining kengaytirilgan yig‘ilishi bo‘lib o‘tdi.
Tadbirda muhtaram Yurtboshimiz: "Tarixdan ma’lum: Vatan va xalq taqdiriga nisbatan tahdidlar kuchaygan vaziyatda aynan millat fidoyilari – uyg‘oq qalbli ziyolilar, shoir va adiblar, san’at namoyandalari, ma’naviyat va ma’rifat sohasi xodimlari jasorat bilan maydonga chiqqanlar.
Mamlakatimiz o‘z taraqqiyotining yangi, yuksak bosqichiga kirayotgan hozirgi paytda bizga jadid bobolarimiz kabi g‘arb ilm-fan yutuqlari bilan birga, milliy qadriyatlar ruhida tarbiya topgan yetuk kadrlar suv bilan havodek zarur", deya ta’kidladilar.
Davlatimiz Rahbarining mazkur yig‘ilishda bildirgan fikr-mulozalaridan kelib chiqib, bugun, 24 yanvar kuni Toshkent viloyati “Ma’naviyat va ma’rifat” markazi katta majlislar zalida viloyatda faoliyat yuritayotgan otinoyilar uchun o‘quv seminari tashkil etildi.
O‘zbekiston Respublikasi Prezidentining jamoat va diniy tashkilotlar bilan hamkorlik masalalari bo‘yicha maslahatchisi Muzaffar Komilov, O‘zbekiston Respublikasi Din ishlari bo‘yicha qo‘mitasi raisi Sodiq Toshboyev, O‘zbekiston musulmonlari idorasi raisi o‘rinbosari, Toshkent islom instituti rektori Muhammadolim Muhammadsidiqov tashrif buyurgan tadbir juda samarali bo‘ldi.
Yig‘ilishda Muzaffar Komilov mamlakatimizda diniy sohada amalga oshirilayotgan islohotlar o‘z samarasi berayotganini alohida ta’kidladi. Shu bilan birga, adashib turli oqimlar ta’siriga tushib qolgan, qilmishidan chin pushaymon bo‘lib, bag‘rikenglik tamoyiliga asosan ozodlikka chiqqan ayol-qizlar bilan tizimli ishlash zarurligini qayd etdi.
Bu jarayonda otinoyilar o‘zlariga biriktirilgan shaxslar bilan muntazam ravishda muloqot qilishi, mahallalar, oilalar bilan tizimli ishlashi kerakligi ta’kidlandi.
O‘zbekiston - demokratik huquqiy davlat. Yurtimizda qonun ustuvor bo‘lishi, har qanday noqonuniy diniy faoliyatga murosasiz bo‘lish muhim masala ekani aytib o‘tildi.
Tadbirda "Bugungi kun otinoyisi qanday bo‘lishi kerak?" degan savol o‘z javobini topdi.
So‘ngra ma’ruzachilar ma’ruza-amaliyot tarzida seminarni davom ettirdilar. Otinoyilar seminar davomida malakali ustozlar tomonidan “O‘z joniga qasd qilish – og‘ir gunoh!”; “Idda haqida”; “Ayollarga xos namozga oid muhim masalalar” kabi mavzularda ma’ruzalar tingladilar.
Seminar ma’ruza-amaliy mashg‘ulot tarzida o‘tkazilganligi bois, savol-javob, debat usullaridan foydalanildi. Shu bilan birga, otinoyilarning mavjud muammolar yuzasidan bergan savollariga javoblar berildi, fikr-mulohaza va takliflari tinglandi.
Ma’ruza, amaliy mashg‘ulot, savol-javob, fikr va tajriba almashinuvi tarzida o‘tkazilgan seminar otinoyilarga har jihatdan foydali bo‘ldi.
Toshkent viloyati vakilligi matbuot xizmati
Turkiy davlatlar muftiylari 10 ga yaqin muhim bayonot va fatvolarni imzoladilar
Xabar berganimizdek, Ozarbayjon poytaxti Boku shahrida Turkiy davlatlar muftiylari kengashining navbatdagi VII yig‘ilishi bo‘lib o‘tdi.
Yig‘ilish yakunida O‘zbekiston, Turkiya, Ozarbayjon, Qozog‘iston va Qirg‘iziston muftiylari muhim yo‘nalishlarda 3 ta bayonot va zamonaviy masalalarga oid 6 ta yirik fatvoni imzolashdi.
Jumladan, «Islomning ilm-fan va texnologiyaga yondashuvi» mavzusidagi bayonotda Islom dinida insoniyat farovonligiga xizmat qiluvchi barcha ilmiy va texnologik yutuqlar qo‘llab-quvvatlanishi bilan birga, ular yuksak axloqiy mezonlar, adolat va mas’uliyat tamoyillari asosida rivojlanishi shartligi ta’kidlandi.
«Musulmonligi ma’lum bo‘lgan shaxsni kofirga chiqarishning hukmi» to‘g‘risidagi bayonotda Islom ta’limotiga ko‘ra, kalimai shahodat keltirib, qibla ahlidan bo‘lgan har qanday shaxs musulmon hisoblanishi hamda qilgan gunohi yoki amaldagi nuqsoni tufayli uni kufrda ayblash (takfir qilish) qat’iyan man etilishi aytildi. Shuningdek, Turkiy davlatlar ulamolari ushbu bayonotda jamiyatda fitna, qon to‘kilishi va nizolarga sabab bo‘luvchi takfirchilik oqimlariga qarshi ilmiy-ma’rifiy kurashni kuchaytirish, ummat birdamligini mustahkamlash zarurligiga e’tibor qaratishdi.
«Oila qurishga targ‘ib qilish, uni muhofaza qilish va mustahkamlashga doir umumiy mas’uliyat» bayonotida Islom ta’limotiga ko‘ra, oila nikoh asosiga quriladigan, sog‘lom avlod va jamiyat davomiyligini ta’minlovchi, insonga ruhiy xotirjamlik hamda axloqiy tarbiya beruvchi muqaddas muassasa ekaniga urg‘u qaratildi. Muftiylar oila institutini himoya qilish, yoshlarni oilaga tayyorlash va milliy-ma’naviy qadriyatlarni mustahkamlashda birdamlikka chaqirdilar.
Shuningdek, muftiylar tomonidan «Bitta qabrga birdan ortiq mayyitni dafn etishning hukmi», «Ijaraga berilgan dehqonchilik yerlarining ushri», «Fatvo so‘rash va fatvo berishda sun’iy idrokdan foydalanish masalasi», «Juma namozi durust bo‘lishining shartlari», hijriy oy boshlanishini aniqlash mezonlari va takfir masalasiga doir 6 ta fatvo matni imzolandi.
O‘zbekiston musulmonlari idorasi Matbuot xizmati
