Farishtalar uyalgan sahoba
Imom Muslim rahimahulloh rivoyat qilgan hadisda Oisha onamiz roziyallohu anho shunday deganlar: “Rasululloh sollallohu alayhi vasallam uylarida yonboshlab yotgan edilar. Boldirlari biroz ochiq edi. Abu Bakr (roziyallohu anhu) kirishga izn so‘radi. U zot unga o‘sha hollaricha (yonboshlagan hollarida) izn berdilar. U kirib, (hojatini) gapirdi. Keyin Umar (roziyallohu anhu) kirishga izn so‘radi. U zot o‘sha (yonboshlagan) holda uning kirishiga izn berdilar. (U kirib, hojatini) gapirdi. Keyin Usmon (roziyallohu anhu) kirishga izn so‘radi. Rasululloh sollallohu alayhi vasallam o‘tirib oldilar va kiyimlarini tuzatdilar. U chiqib ketgach men: “Ey Rasululloh, Abu Bakr (roziyallohu anhu) kirdi. O‘rningizdan turmadingiz, qo‘zg‘almadingiz, parvo ham qilmadingiz. Keyin Umar kirgan edi, unga ham o‘rningizdan qo‘zg‘almadingiz, parvo ham qilmadingiz. So‘ngra Usmon kirganda esa o‘tirib oldingiz va kiyimingizni tuzatdingiz?!” degan edim, Rasululloh sollallohu alayhi vasallam “Farishtalar hayo qilib, uyaladigan kishidan men qanday uyalmay?” dedilar”.
Nozimjon Iminjonov tarjima qildi
Banklar va mikromoliya tashkilotlari o‘z faoliyatini islomiy bank faoliyatiga o‘zgartirishi mumkin
Adliya vazirligi Mikromoliya tashkiloti va bank faoliyatini o‘zgartirish tartibi to‘g‘risidagi nizomga o‘zgartirish va qo‘shimchalarni davlat ro‘yxatidan o‘tkazdi (ro‘yxat raqami 3656-1, 01.08.2026 y.), xabar bermoqda huquqiyaxborot Telegram kanali.
Mazkur idoraviy hujjat "O‘zbekiston Respublikasining ayrim qonun hujjatlariga O‘zbekistonda islomiy bank faoliyatini joriy etishga qaratilgan qo‘shimcha va o‘zgartirishlar kiritish to‘g‘risida" 2026 yil 27 martdagi O‘RQ–1126-son Qonunga muvofiq ayrim kredit tashkilotlari faoliyatini o‘zgartirishning quyidagi tartib-taomillarini belgilaydi:
- mikromoliya tashkilotini faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini faqat islomiy bank faoliyatini amalga oshiruvchi bankka o‘zgartirish;
- faqat islomiy bank faoliyatini amalga oshiruvchi bankni faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini mikromoliya tashkilotiga o‘zgartirish;
- bankni faqat islomiy bank faoliyatini amalga oshiruvchi bankka o‘zgartirish.
Shuningdek, o‘z faoliyatini faqat islomiy bank faoliyatini amalga oshiruvchi bankka o‘zgartirishga faqat islomiy bank faoliyatini amalga oshiruvchi mikromoliya banki haqli.
Mikromoliya bankini davlat ro‘yxatidan o‘tkazish va bank faoliyatiga doir tegishli litsenziya (litsenziyalar) olish uchun nogironligi bo‘lgan shaxslar uchun mikromoliya banki binolarida shaharsozlik normalari va qoidalarida belgilangan talablarga muvofiq qulay shart-sharoitlar yaratilganligi bo‘yicha Qurilish va uy-joy kommunal xo‘jaligi sohasida nazorat qilish inspeksiyasining xulosasi mavjud bo‘lishi kerak.
Tashabbus Fors ko‘rfazi mamlakatlaridan investitsiyalarni jalb qilishga qaratilgan bo‘lib, dastlabki hisob-kitoblarga ko‘ra, ushbu chora-tadbirlarni amalga oshirish iqtisodiyotga depozitlar va to‘g‘ridan to‘g‘ri investitsiyalar ko‘rinishida taxminan 1 milliard dollar jalb qilishi mumkin. Mutaxassislarning prognozlariga ko‘ra, 2035 yilga borib O‘zbekiston ushbu tizim ishga tushirilgandan beri dunyoda islom moliyasining eng tez o‘sishini namoyish etadi.
O‘zbekiston musulmonlari idorasi Matbuot xizmati
