Atrofga nazar solsangiz, odamlarning qilayotgan har bir harakati zamirida ma’lum bir insonlarning e’tirofi ya’ni sevgisiga erishish yotadi. Xo‘sh, nima bo‘libdi dersiz. Hech nima. Mana shu hech nima bo‘lmaydigan, o‘tkinchi e’tirof va tuyg‘ular uchun juda ko‘p vaqtimiz va sog‘ligimizni sarflaymiz. Natija esa biz o‘ylagandek bo‘lmaydi.

Ba’zida yuzi nurli, qalbi – o‘zi ta’kidlamasa-da pok bo‘lgan, ko‘pchilik tomonidan e’zozlanadigan insonlarni ko‘rib “Xudo suygan banda ekanda” deb qo‘yamiz. Yana bir toifa odamlar bor. Ularning yurish-turushidan nolib, aksariyat kishilar “Xudo urgan odam u” deydi.

Alloh taolo O‘z Kalomi Qur’oni karimda O‘zi sevgan bandalari hamda yomon ko‘rgan toifalari haqida xabar berib, bir qancha oyat nozil qilgan.         Quyida mazkur toifalarning ayrimlarini taqdim etamiz.

Alloh taoloning sevgisiga sazovor bo‘ladigan toifalar:

“Ayting (ey Muhammad!): Agar Allohni sevsangiz, menga ergashingiz. Shunda Alloh sizlarni sevadi va gunohlaringizni mag‘firat etadi. Alloh kechiruvchi va rahmlidir”. (Oli Imron, 31)

“Albatta, Alloh ezgulik qiluvchilarni sevadi”. (Moida, 13)

“Albatta, Alloh odillarni sevadi”. (Moida,42)

“Imon keltirganlarning Allohga bo‘lgan sevgilari esa (ularnikidan) kuchliroqdir”. (Baqara, 165)

“Albatta, Alloh (shungacha bilmay yo‘l qo‘ygan xatolaridan) chin tavba qiluvchilarni va obdon poklanib yuruvchilarni sevadi”. (Baqara, 222)

“Aslida esa, kim (Alloh) ahdiga vafo qilsa va taqvoli bo‘lsa, albatta, Alloh (bu kabi) taqvodorlarni sevadi”. (Oli Imron, 76)

Alloh taolo sevmaydigan toifalar:

“Albatta, U isrof qiluvchilarni sevmaydi”. (An’om,141)

“Albatta, Alloh kibrli va maqtanchoq kishilarni sevmaydi”. (Niso, 36)

“Allohga ham, oxirat kuniga ham imon keltirmaydiganlarni (Alloh sevmaydi)”. (Niso, 38)

“Albatta, Alloh xiyonatchi va jinoyatchi bo‘lgan kimsani sevmaydi”. (Niso,107)

“Albatta, U isrof qiluvchilarni sevmaydi”. (Niso, 141)

Mazkur oyatlarda Alloh taolo qaysi toifa odamlarni sevishi-yu, qaysi toifani sevmaligini ochiq-oydin ta’kidlamoqda. Bizlarga berilgan imkoniyat esa qaysi toifada bo‘lishni tanlash. Har birimizning qilayotgan niyat va amallarimiz yo Allohning g‘azabiga, yoki sevgisiga musharraf etadi.

Barchamizga Alloh taolo, O‘zi sevgan bandalari qatorida bo‘lishlikni nasib etsin!

Saidabror Umarov