Bugun, 3 yanvar kuni Turkiyaning O‘zbekistondagi elchisi Ahmed Bashar Shen O‘zbekiston musulmonlari idorasiga tashrif buyurdi. Mehmon muftiy Usmonxon Alimov hazratlari bilan muloqot o‘tkazdi.
Muftiy hazratlari Ahmed Basharning elchilik davrida O‘zbekiston va Turkiya o‘rtasidagi munosabatlar yanada mustahkamlangani, bunda elchining sa’y-harakatlari katta bo‘lgani, 2017 yil oktyabr oyida O‘zbekiston Prezidenti Turkiyaga, 2018 yil aprel oyida Turkiya Prezidenti O‘zbekistonga rasmiy safarlari, shuningdek, Turkiya diyonat ishlari vaziri Ali Erbosh hazratlarining yurtimizga tashrifi davomida juda katta natijalarga erishilganini alohida qayd etdilar.
Shuningdek, muftiy hazratlari Prezidentimiz tashabbusi bilan tashkil etilgan “Vaqf” xayriya jamoat fondi faoliyatini Turkiya tomonidan qo‘llab-quvvatlagani katta mamnunlik baxsh etganini izhor qildilar. Ahmed Basharni O‘zbekistondagi elchilik faoliyati muvaffaqiyatli nihoyalangani bilan qutlab, keyingi faoliyatlarida muftiy hazratlari ulkan yutuqlar tiladilar.
Elchi Ahmed Bashar janoblari O‘zbekistonda qisqa vaqt ichida (ikki yil) juda ko‘p do‘stlar orttirgani, mana shunday do‘stlarning yordami ila juda katta muvaffaqiyatlarga erishganini bildirdi. O‘tgan ikki yil ichida O‘zbekiston va Turkiya davlatlarining hamkorlik aloqalari yangi bosqichga ko‘tarilgani, ko‘p tomonlama aloqalar rivoj topgani, ayniqsa, diniy sohada ko‘p yutuqlar qo‘lga kiritilgani, xususan, Turkiya diyonat ishlari vaziri Ali Erbosh janoblarining ikki marta O‘zbekistonga tashriflari tashkil etilganini alohida ta’kidladi. Ahmed Bashar o‘zining ota yurtidan ketayotgani, lekin bu zamin uning yuragida butun umr qolishini bildirdi.
Uchrashuv do‘stona va samimiy ruhda o‘tdi.
O‘zbekiston musulmonlari idorasi Matbuot xizmati
Bismillahir Rohmanir Rohiym
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Agar sovchi qo‘yilgan ayol yoki uning valiysi tomonidan mazkur sovchilikka rozilik javobi berilsa, unashtirilgan bo‘ladi.
Unashtirish ikki tomondan oila qurish uchun berilgan va’dadir. Bu narsa ham uylanish, er‑xotin bo‘lish emas. Shuning uchun ham unashtirilgan ikki kishi bir-biriga ajnabiy – begona holida turadilar. Ular "unashtirib qo‘yildik", deb xilvatda yolg‘iz qolishlari, bir-birlari bilan er‑xotindek muomalada bo‘lishlari mutlaqo mumkin emas, faqat nikoh aqdidan keyingina er‑xotin bo‘ladilar.
Unashtirilgandan keyin to‘y qilib, oila qurish eng marg‘ub ishdir. Unashtirilgandan so‘ng ajrashish yaxshi emas. Lekin uzrli sabablarga ko‘ra ajrashishsa, joiz.
Unashtirilish faqat va’dadan iborat bo‘lganligi uchun, undan keyin ajrashish oqibatida hech qanday majburiyatlar sobit bo‘lmaydi.
Agar bu orada hadya oldi-berdisi bo‘lgan bo‘lsa, aynigan tomon zarariga bo‘ladi. Misol uchun, erkak aynigan bo‘lsa, berganini qaytarib olishga haqqi bo‘lmaydi. Agar ayol kishi aynigan bo‘lsa, hadyani erkak tarafga qaytarib bergani yaxshi.
Ushbu ishlarning barchasi o‘zaro hurmat va Islomiy odob asosida olib borilishi lozim. Nasib bo‘lmay, oila qurishga ittifoq qilinmay, sovchilik yoki unashtirishdan keyin ajralish ro‘y beradigan bo‘lsa ham, bir-birlarining obro‘larini to‘kmay, yaxshilik bilan ajralishlari zarur.
«Baxtiyor oila» kitobidan