Alloh taolo insonga umr beradi. Inson bu berilgan umrni g‘animat bilib, hayotini xayrli ishlar bilan mazmunli qilishi uchun savob ishlarni amalga oshiradi. Karimov Abdulhakim hoji ota o‘z umrini fidoyilik va xalq xizmatiga bag‘ishlagan, 100 yosh bilan yuzlashgan mana shunday insonlardan biridir. Abdulhakim hoji ota 1919 yil 1 yanvar kuni Toshkent shahrining Yakkasaroy tumani Qushbegi mahallasida tug‘ilgan. U kishi yigirma yoshga kirganda ikkinchi jahon urushiga ketib, 1945 yili g‘alaba nashidasini surib, sog‘-omon qaytib kelganlar.

Abdulhakim hoji otaning ilmga bo‘lgan muhabbatlari sabab, 1948 – 1951 yillar orasida Nizomiy nomidagi Toshkent davlat pedagogika universitetida ta’lim oladi. Shundan keyin 50 yil yoshlarga ta’lim berish sohasida ishlab, endilikda keksalik gashtini surmoqda.

Abdulhakim hoji ota Karimova Rohatoy hoji ona bilan turmush qurishgan. Mana 73 yildirki, hoji ota va hoji ona tinch va totuv yashab kelmoqda. Bu tabarruk oilaning 7 nafar farzandi bor, 4 nafar o‘g‘il va 3 nafar qiz. Shuningdek, 33 nevara, 89 evara va 5 chevara bor. Bu ahil oila sababchilari bo‘lmish Abdulhakim hoji ota va Rohatoy hoji ona bir guruh faxriylar bilan 2017 yil muhtaram Prezidentimiz rahnamoliklarida muborak haj ziyoratini ado etdilar.

Kuni kecha farzandu arjumandlar tomonidan Abdulhakim hoji otaning tabarruk 100 yoshga to‘lganlari munosabati bilan ehson dasturxoni yozildi, hoji ota va hoji onaga sog‘lik-salomatlik tilandi.

O‘zbekiston musulmonlari idorasi Matbuot xizmati