Albatta, sen Ramazon oyida Masjidul Haromda 50 ming namozxonlarning qo‘llarida Qur’on ushlab, uni o‘qib o‘tirganlarini ko‘rasan. Lekin ulardan 50 kishining o‘zi o‘qiyotgan oyatlarini tushunishini yoki ular haqida tafakkur qilib ko‘rishini topmaysan.

*****

Agar bitta tovuq atrofiga ikkita xo‘roz kelib qolsa, ikkisi ham tovuqni himoya qilib, sherigidan rashk qilib bir-biri bilan urushadi.

Iskandariya shahrining dengiz qirg‘oqlarida va Bayrutda musulmon erkaklar o‘zlarining muslima ayollarini begona erkaklardan rashk qilmaydilar. 

*****

Erkakning ayolning iffatiga bo‘lgan hamlasi bo‘rining qo‘yga bo‘lgan hamlasidan va qo‘yning o‘lishidan yuz marotaba og‘irroqdir. 

*****

Chekinishdan, mag‘lubiyatdan olinadigan ibrat g‘alabadan olinadigan ibratdan kattaroq bo‘ladi.

*****

Lazzatli narsalarning barchasini totib, tajriba qilib ko‘rdim. Kitob bilan xoli qolishdan-da yoqimliroq narsani ko‘rmadim.

*****

Shaharlar, mamlakatlar ham odamlarga o‘xshaydi. Tug‘iladi, o‘ladi, yosh bo‘ladi, keksayadi, aziz bo‘ladi, xor bo‘ladi.

*****

 أَفَلَا يَتَدَبَّرُونَ الْقُرْآنَ أَمْ عَلَى قُلُوبٍ أَقْفَالُهَا

“Qur’onni tadabbur ila o‘ylab ko‘rmaslarmi? Yoki qalblarida qulf bormi?” (Har bir oyatni, har bir so‘zni chuqur tushunishga harakat qilish Qur’onni tadabbur qilishdir. O‘shanda parda ko‘tariladi, hamma narsa ravshanlashadi, qalb halovot topadi, vijdon musaffo bo‘ladi. “Qalblarida qulf” bo‘lsa, unda hamma narsa berk, ularga hech narsa, jumladan, Qur’on nuri ham kirmaydi.) (Muhammad surasi, 24-oyat).

Qur’onda aytilayotgan gaplarni tushunishimiz uchun bu qulflarni qachon sindiramiz?!

*****

Kim men(ing yozganlarim)dan biror narsa o‘qisa yoki men(ing yozganlarim)dan biror narsa eshitsa, undan menga bo‘ladigan mukofot haqqimga duo qilishidir.

Nozimjon Iminjonov tarjimasi