Quyida keltiriladigan fikrlar, hikmatlar ijtimoiy tarmoqlardagi turli sahifalardan olib tarjima qilingan. Bundan tashqari sahobai kiromlar, ulug‘ olimlar, Yaqin Sharq, Osiyo, Yevropa va Amerika mutafakkirlarining bir qator fikrlari ham berilgan.  

*****

Ular yolg‘onchilardir. Yolg‘onchiliklarini o‘zlari ham bilishadi. Yolg‘onchiliklarini biz bilishimizni ham bilishadi. Shunday bo‘lsa ham baland ovozda yolg‘on gapiraveradilar.

Najib Mahfuz

*****

Afrika qit’asiga dori-darmonlar jo‘natishga qaror qildik. Bu juda ham yaxshi insonparvarlikdir. Lekin muammo dorilar qutisiga “Ovqat yegandan so‘ng” deb yozib qo‘yilganidir.

“Tarix muhrlagan so‘zlar”

*****

Kitoblarning do‘stligi insonlarning do‘stligidan afzaldir. Chunki kitoblar hech narsa talab qilmasdan, doim foyda beradi.

“Tarix muhrlagan so‘zlar”

*****

Dushmanlaringning gaplariga yaxshilab quloq sol. Chunki ularning ko‘p gaplarida yaxshi ko‘rganlaring yashirgan haqiqat bor bo‘ladi.

“Tarix muhrlagan so‘zlar”

*****

Boshqaning gapini senga olib kelgandan ehtiyot bo‘l. Chunki u sening ham gapingni boshqaga yetkazadi.

Hasan Basriy rahimahulloh

*****

Agar sen ehtiyojing tushmagan narsani sotib olgan bo‘lsang, vaqti kelib, o‘zingga kerak bo‘lgan narsani sotishga majbur bo‘lasan.

“Tarix muhrlagan so‘zlar”

*****

Men hech kimni tashlab ketmayman. Lekin ketmoqchi bo‘lgan kimsaning qo‘lidan ushlab olmayman.

Mahmud Darvesh

*****

Farzandlaringizga sidq – rostgo‘ylikni o‘rgatinglar! Rostgo‘ylik ularga hamma narsani o‘rgatadi.

“Tarix muhrlagan so‘zlar”

*****

Eng afzal intiqom – shiddat bilan muvaffaqiyatga erishishingdir.

“Tarix muhrlagan so‘zlar”

To‘plab, tarjima qiluvchi Nozimjon Iminjonov