Shavkat Mirziyoyev Turkiyada «Yilning xorijiy davlat arbobi» deb topildi
O‘zbekiston Prezidenti Shavkat Mirziyoyev Turkiyaning Tursomoney moliyaviy-iqtisodiy jurnalining yillik reytingida “Yilning xorijiy davlat arbobi” deb topildi. Bu haqda Istanbulda hukumat, parlament, jamoatchilik va ishbilarmon doiralar vakillari ishtirokida o‘tkazilgan tantanali marosimda e’lon qilindi.
Mazkur reyting ikki asosiy — “Yilning xorijiy davlat arbobi” va “Turkiyaning atoqli davlat arbobi” — nominatsiya va 6 ta yo‘nalish bo‘yicha belgilanadi. Kollegial komissiya va jyuri qarori Turkiya hamda chet el siyosatchilari, biznes vakillari faoliyatini o‘rganish va tahlil qilish asosida qabul qilinadi. Jyuri tarkibiga jurnal ekspertlari, Turkiya hukumati va parlamenti a’zolari, mamlakat mintaqalari vakillari kiradi.
Xabar berishlaricha, O‘zbekiston davlat rahbarining tashqi dunyo, xususan, Turkiya va Markaziy Osiyo davlatlari bilan siyosiy-iqtisodiy aloqalar va o‘zaro hamkorlik mustahkamlanishiga qo‘shgan salmoqli hissasi e’tirof etilgan. Turkiyaning sobiq bosh vaziri, hozirda parlament spikeri Binali Yildirim reytingdagi ikkinchi asosiy nominatsiya g‘olibi bo‘ldi.
Shavkat Mirziyoyev avvalroq Osiyo jurnalistlari uyushmasi tomonidan siyosat yo‘nalishi bo‘yicha “Osiyoda yil odami” deb topilgan edi.
O‘zbekiston musulmonlari idorasi Matbuot xizmati
“Arab Tourist”: Samarqand, Buxoro va Xiva — islom sivilizatsiyasi va jahon madaniy merosining bebaho durdonalari
Saudiya Arabistonining turizm va sayohatlarga ixtisoslashgan “Arab Tourist” elektron nashrida “Markaziy Osiyoning qoq markazida joylashgan va Buyuk ipak yo‘li bilan bog‘langan mamlakat” sarlavhali tahliliy maqola e’lon qilindi, deb xabar bermoqda “Dunyo” AA.
Maqolada Buyuk ipak yo‘li tarixida o‘zbek shaharlarining tutgan o‘rni alohida e’tirof etiladi. Xususan, Samarqand, Buxoro va Xiva kabi tarixiy shaharlar asrlar davomida Sharq va G‘arb o‘rtasidagi savdo, fan va madaniyat markazlari sifatida xizmat qilgani ta’kidlanadi. Registon maydoni, Ichan-qal’a va Buxorodagi me’moriy obidalar islom sivilizatsiyasi hamda jahon madaniy merosining bebaho durdonalari sifatida tilga olinadi.
Bundan tashqari, nashr O‘zbekistonning rang-barang tabiati va geografik relefiga to‘xtalib o‘tgan. Qizilqum cho‘li, serhosil Farg‘ona vodiysi, Tyan-Shan va Pomir-Oloy tog‘ tizmalari aholi joylashuvi va qishloq xo‘jaligi rivojida muhim o‘rin tutishi qayd etiladi.
Nashr, shuningdek, Buyuk Mirzo Ulug‘bek kabi donishmandlarning astronomiya va matematika sohasidagi buyuk kashfiyotlarini alohida e’tirof etgan.
Xulosada ta’kidlanganidek, Toshkent, Samarqand, Buxoro, Namangan va Andijon kabi shaharlar bugungi kunda nafaqat ma’muriy va iqtisodiy, balki jadal rivojlanayotgan yirik madaniy-turistik markazlar sifatida dunyo sayyohlari e’tiborini o‘ziga jalb etmoqda.
O‘zbekiston musulmonlari idorasi Matbuot xizmati
