“Xoja Buxoriy”da pedagogik amaliyot
Ma’lumki, Respublikamiz ijtimoiy-siyosiy hayotining barcha sohalarida bo‘lgani kabi ta’lim sohasida ham tub o‘zgarishlar jarayoni kechmoqda. O‘zbekiston Respublikasining «Ta’lim to‘g‘risida»gi qonuni va «Kadrlar tayyorlash milliy dasturi» ta’lim tizimi jumladan, oliy ta’lim muassasalari oldiga pedagogik kadrlarni tayyorlashni tubdan yaxshilash vazifasini qo‘ymoqda.
Kitob shahar «Xoja Buxoriy» o‘rta maxsus islom bilim yurtida Toshkent islom institutining 5 nafar amaliyotchi talabalari pedagogik amaliyot o‘tkazib kelmoqdalar.
Albatta, bo‘lajak o‘qituvchilarni tayyorlashning muhim bosqichlaridan biri pedagogik amaliyot sanaladi. Oliy ta’lim muassasasi auditoriyasida egallangan nazariy bilimlar, malaka va ko‘nikmalar amaliyot davomida sinovdan o‘tadi, rivojlantiriladi. Aynan shu amaliyot jarayonida talabalar o‘quvchilarni tarbiyalashga, o‘quv va tarbiyaviy jarayonlarni uzviy birlikda amalga oshirishga, bolalarni g‘oyaviy-siyosiy, aqliy, ahloqiy, mehnat, jismoniy hamda estetik jihatdan tarbiyalashning birligini ta’minlashga o‘rganadilar.
Bilim yurtida 21 dekabr kuni amaliyotchilar rahbari Toshkent islom institutining tillar kafedrasi mudiri Sherzod Cho‘lponov amaliyotchi talabalar bilan uchrashib, dars jarayonlarida ishtirok etdi va amaliyotchi talabalarga o‘z taklif va tavsiyalarini berdi.
Shuningdek, Sherzod Cho‘lponov va bilim yurtining “Talabalar ilmiy jamiyati” a’zolari o‘rtasida mazmunli suhbat tashkil etildi. Suhbatda bilim yurti mudiri O‘.G‘uzarov ham ishtirok etdi. Suhbat davomida Sherzod Cho‘lponov “Talabalar ilmiy jamiyati” a’zolari tomonidan bajarilgan ilmiy ishlar bilan tanishdi hamda talabalarga ilmiy izlanishda bardavom bo‘lib, el yurt manfaati va dinimiz taraqqiyoti yo‘lida astoydil harakat qilishlarini tilab qoldi.
Azamat Usmonov
Erhan Afyonju: O‘zbekiston – turkiy sivilizatsiyaning eng go‘zal shaharlari joylashgan zamin
Turkiyaning “CNN-Türk” telekanalida efirga uzatilgan “Tafakkur doirasi” dasturida so‘zga chiqqan taniqli olim, Milliy mudofaa universiteti rektori, professor Erhan Afyonju O‘zbekistonning boy tarixiy merosi va sayyohlik salohiyati haqida fikr yuritdi, deb xabar bermoqda “Dunyo” AA.
Ko‘rsatuvda qatnashgan turk tarixchisi Erhan Afyonju O‘zbekistonni turkiy sivilizatsiyaning eng go‘zal shaharlari joylashgan alohida geografik hudud sifatida ta’riflagan.
Olimning fikricha, juda ko‘pchilik sayyohlar O‘zbekistonni o‘z ko‘zi bilan ko‘rishni istaydi. Chunki dunyoga mashhur Samarqand, Buxoro, Xiva, Toshkent kabi shaharlar ana shu zaminda joylashgan.
Turk tarixchisi yoshlarga murojaat qilib, xorijga sayohat qilishni, avvalo, Turkiy dunyo mamlakatlarini kashf etish, ajdodlar yurti bilan yaqindan tanishishdan boshlash lozim ekanini ta’kidladi.
“Yoshlarga tavsiyam shuki, hozir xorijga sayohat qilmoqchi bo‘lsangiz, avvalo Turkiy zaminni aylaning. Masalan, O‘zbekistonga borib, tarixiy shaharlarni ko‘rib keling, ajdodlaringiz yurti bilan tanishing. So‘ng Saljuqiylar davlati barpo etilgan zaminlarni ko‘ring”, – dedi professor.
Erhan Afyonjuning ta’kidlashicha, bunday sayohatlar yoshlar uchun har tomonlama foydali va qiziqarli bo‘lib, ularning tarixiy xotirasi va dunyoqarashini boyitadi.
“Masalan, Samarqandning go‘zalligini dunyoning ko‘p joylarida topa olmaysiz. Ayniqsa, turk yoshlari o‘z ajdodlari yashagan zaminni borib ko‘rishlari lozim”, – dedi olim.
Professor O‘zbekistonni turkiy sivilizatsiyaning asosiy beshiklaridan biri, ilm-fan markazi sifatida ham alohida e’tirof etgan.
Shuningdek, turk tarixchisi O‘zbekistonning nafaqat tarixiy va madaniy, balki geografik jihatdan ham yashash uchun qulay hudud ekanini ta’kidlagan.
Dastur davomida professor bildirgan fikr-mulohazalar Turkiya jamoatchiligi orasida O‘zbekistonning tarixiy shaharlari, boy madaniy merosi va turizm salohiyatiga bo‘lgan qiziqishni yanada oshirishga xizmat qiladi.
O‘zbekiston musulmonlari idorasi Matbuot xizmati
